Maniitsumi nunaqarfinnilu imigassaq pillugu innuttaasunik ataatsimiisitsineq

Peqqissutsimut Naalakkersuisoq Agathe Fontain Maniitsumi, Napasumi Atammimmilu Inatsisartut imigassaq pillugu inatsisissaatut siunnersuut pillugu innuttaasunik ataatsimiisitsereerluni maanna Nuummut uterpoq.

Soorlu Sisimiunisut nunaqarfiinilu innuttaasut siunnersuummut soqutiginnillutik inatsimmullu isummatik annikkusullugit peqataapput.

Innuttaasunik ataatsimiisitsinermi malunnartumik oqaatiginiarneqarpoq naleqqutinngitsumik pissusilersortarnerup nipaatsumik akuersaarneqarpallaartoq. Assersuutigalugu malunnartumik aalakoortut pisiniarfinni imigassamik pisitinneqartarnerat taamaalillutik pisinianut sumiiffinnilu kikkut tamarmik  ornissinnaasaannut akornusersuillutik, naak taamaliorneq inerteqqutaagaluartoq.

Eqimattani oqalliffiusuni eqqartorneqarpoq, meeqqat atuarfiini, ilinniarfinni innuttaasullu akornanni, meeqqatut, innuttaasutut suliffeqarfittullu killiliisinnaanissaq oqallisigineqarnerusariaqartoq.

Qeqqata Kommuniata illoqarfiini nunaqarfiinilu tikeraarnerup takutippaa innuttaasunit ataatsimiinnermi peqataasunit imigassaq pillugu inatsit tapersersorneqartoq.

Ataatsimiisitsinermi isumaqataaffigineqarpoq meeqqat inuusuttullu ersittumik erngunnermut ussassaarinernullu illersorneqassasut. Innuttaasunik ataatsimiisitsinerni tamani siunnersuutigineqarpoq imigassanik tuniniaanerit pisiniarfinniit peerneqartariaqartut immikkullu pisiniarfeqalerlutik, meeqqat inuusuttut ilaqutariillu ammasumik tuniniaasoqarfinniinnginniassammata.

Naggataatigut eqqaaneqarsinnaavoq Atammimmi peqataasut amerlanerullutillu oqallikkusunnerusut. Innuttaasunik ataatsimiisitsinermi tamani siunnersuutit pitsaasut saqqummiunneqarput.

Taamatuttaaq inatsisartut ataatsimiinnginneranni Agathe Fontain Kommune Kujalleq aamma Qaasuitsup Kommunianut ataatsimiisitserusuppoq innuttaasunik imigassaq pillugu inatsimmut siunnersuut oqallisitigikkumallugu.   

Paasisaqarnerorusukkuit Naalakkersuisumut allatsi Nauja Møller oqarasuaat +299 58 26 54-mut attavigineqarsinnaavoq.