Silap pissusianut tunngasumik suliniummut aningaasanik taperneqarsinnaavutit


Suliniummut isumassarsiatsialammik ataani taaneqartuni minnerpaamik ataatsimik siunertalimmik peqarpit?
  • Silap pissusiata allanngoriartornerata pinngortitamut inuiaqatigiinnullu sunniutaasa ilisimaneqarnerulernissaat.
  • Silap pissusiata allanngoriartorneranut naleqqussarnissamut pilersaarusiornissaq.
  • Silap pissusiata allanngoriartorneranut naleqqussarnissamut tunngatillugu suliniutit aallarniutaasinnaasut pilersissallugit.
  • Paasissutissiineq silallu pissusianut tunngassutilinnik suliaqartunik ilisimasanik avitseqateqarneq.
Taamaappat maanna suliniutinnut Silap pissusianut aningaasaliissutinit taperneqarnissannut periarfissaqarputit. Silap pissusianut aningaasaliissutit Pinngortitamut Avatangiisinullu Naalakkersuisoqarfimmit aqunneqarpoq. Ukioq manna Naalakkersuisoqarfimmit katillugit 100.000 kr. tunniunneqassapput.

Piumasaqaatit ataani taaneqartut suliniummi malinneqassapput:
  • Suliniummi aningaasartuutit minnerpaamik 30 procentii nammineq akilerneqassapput imaluunniit allaninngaanneersuullutik. Aningaasarsiat nammineq akilikkat ilaattut ilaasinnaapput.
  • Kalaallit Nunaanni suliniut tunngaveqassaaq.
  • Suliniummi inernerit misilittakkallu inunnut allanut apuunneqassapput, iluaqutaaqqullugit.
  • Suliniut kingusinnerpaamik decembarip 31-ani 2017 naammassereersimassaaq.
Suliniutinut qinnuteqaatit nassiunneqarnissaannut ulloq killigitinneqartoq tassaavoq oktobarip aallaqqaataat 2017. Silap pissusianut aningaasaliissutinut qinnuteqarnermi immersugassaq atorneqassaaq. Qinnuteqartut qinnuteqaamminnik akuerineqartut kingusinnerpaamik oktobarip 13-ani nalunaarfigineqassapput.
Silap pissusianut aningaasaliissutinut qinnuteqarnermi immersugassaq paasissutissallu allat uani takuneqarsinnaapput.

Qinnuteqarnermi immersugaq uunga nassiunneqassaaq pan@nanoq.gl imaluunniit uunga:

Pinngortitamut Avatangiisinullu Naalakkersuisoqarfik
Pinngortitamut Silallu pissusianut immikkoortortaqarfimmut
Postboks 1614
3900 Nuuk
Allagartalerlugu: Klimapuljen


Silap pissusianut aningaasaliissutit pillugit apeqqutissaqaruit Pinngortitamut Avatangiisinullu Naalakkersuisoqarfik atassuteqarfigisinnaavat uunga: pan@nanoq.gl, imaluunniit Tlf. 345000.