Qaasuitsup Kommuniani atuakkanik ujarassiornermi ilitsersuutinik nutaanik sulineq aallartinneqartoq

Ataata Kuua – Nuussuarmi Atanimi  ujarannguunnerit. – Assiliisoq MMR

Aatsitassanut Ikummatissanullu Naalakkersuisoqarfimmi Ujarassiornermut Immikkoortortaqarfik Kalaallit Nunaanni illoqarfinnut arlalinnut atuakkanik ujarassiornermi ilitsersuutinik suliaqarluni aallarteruttorpoq. Atuakkat ilitsersuutit ujarassiuunuunngitsoq; innuttaasunut, atuarfinnut takornarianullu qanitaminni ujarassiornermut tunngasunik ilisimasaqarnerujumasunut sammititaapput. Atuakkattaaq  takornariaqarnermi ujarassiornermik sammisaqarumasunut atorneqarsinnaanerat eqqarsaataavoq.

Ukioq manna piffimmi sulinerit Qaasuitsup Kommuniani piffinni aalajangersimasuni ingerlanneqassapput, tassanilu Ujarassiornermut Immikkoortortaqarfik piffissami 28. juli – 13. august 2017 Qeqertarsuup Tunuani Uummannallu eqqaani suliaqassapput. Sulinerit Ilulissani aallartinneqassapput, tassanngaanniillu  Oqaatsunut, Nuussuarmut, Uummannamut, Qasigiannguanut Qeqertarsuarmut Aasiaallu eqqaanut ingerlaqqittoqassalluni. Inuit sisamat angalaqataassapput: ujarassiuut pingasut assiliisartorlu ataaseq. 

Atuakkat ilitsersuutit umiatsiamit orninneqarsinnaasuni piffinni sinerissamut qanittumiittunik kiisalu illoqarfimmit nunaqarfimmillu qanittuni pisuinnarmik orninneqarsinnaasunit aallaaveqassapput. Atuartartup atuagaq ilitsersuut atorlugu piffimmi ujaqqanik paasisaqarlunilu kiisalu ulluinnarni pinngortitami avatangiisitsinni ujaqqanut tunngasunik oqaatsit/taaguutit paasisaqarfigissagai eqqarsaataavoq.  

Atuakkat ilitsersuutit nutaatut Aatsitassanut Ikummatissanullu Naalakkersuisoqarfimmit saqqummersitaassapput.

Aatsitassanut Ikummatissanullu Naalakkersusup suliat inernerisa innuttaasunut tamanut iluaqutaasinnaanerat pillugu suliaq qaninut malinnaaffigaa. 

Aatsitassaatigut tamatsinnut iluaqutaassapput, taamaattumillu uannut pingaaruteqarpoq annertunerusumik aatitassaatigut pillugit piffinni atorneqarsinnaasunik ilisimasanik pilersitsinissarput. Piffinni ilisimasat atorlugit ass. nunaqavissut annikitsumik aatsitassarsiorsinnaanerat imaluunniit takornariaqarnermi ujarassiornermut sammisumik

 aallartisaasinnaanerannut periarfissaat pitsanngorsarneqarsinnaapput. Taamaattumik atuakkat ilitsersuutit nunaqavissut amerlanerit ataatsimoorluta pisuussutitsinnut atorluaanerusinnaanissaannut tapertaassapput. Atuakkanik ilitsersuusiorluni piffinni suliaqarneq pillugu Aatsitassanut Ikummatissanullu Naalakkersuisoq taama oqaaseqarpoq.

Annertunerusumik paasisaqarumallutik ujarassiooq  Jan Schulz Adolfsen: 34 68 43, imaluunniit e-mail: jasa@nanoq.gl atorlugu saaffigiuk.