Aalisarnermut Piniarnermullu Naalakkersuisoqarfiup aalisarsinnaanermut akuersissutit nakkutigilluaqqissaarpai

Stemningsbillede Kommunit umiatsiaaqqamik aalisarsinnaanermik aamma sinerissap qanittuani qaleralinniarsinnaanermut, saarullinniarsinnaanermut aamma nipisat suanniarsinnaanermut akuersissutit januaarip aallaqqaataanit 2017-imi tunniuttalerpaat.

APN-ip, Aalisarnermut Piniarnermullu Naalakkersuisoqarfiup akuersissutinik kommuninut qinnuteqarsimagaluarlutik akuerineqarsimanngitsut suliarisarpai, immikkut akuersissuteqartitsinissaq siunertaralugu suliarisarlugit.

Qinnuteqartup akuersissuteqarnissamut piumasaqaatit tamaasa naammassisimanngikkunigit immikkut akuersissuteqarnissamik qinnuteqarsinnaavoq. Tamatumunnga Aalisarnermut Piniarnermullu Naalakkersuisoqarfik akuliutsinneqartarpoq, Naalakkersuisoqarfimmi immikkut akuersissuteqartitsinissaq siunertaralugu suliarinnittoqartarluni.

Sermitsiaq.AG juulip 21-anni allappoq Aalisarnermut Piniarnermullu Naalakkersuisoqarfimmi tukattumik ingerlasoqarnerarlugu allaaserisaqarpoq, Naalakkersuisoqarfimmi aalisarnermut akuersissutinik qinnuteqarsimasut tunineqarnissaannut nakkutigineqanngitsumik pisoqarnerarlugu allaaserinnilluni.

Sermitsiaq.AG-mik atuartartut allaaserisaq atuareerlugu isumaqalinnguatsiarput aalisarsinnaanermut akuersissutit Aalisarnermut Piniarnermullu Naalakkersuisoqarfiup tamaasa qinnuteqarsimasunut tunniuttarai. Taamaaqqajanngilarli.

Aalisarsinnaanermut akuersissutit pisassiissutillu pillugit Namminersornerullutik Oqartussat nalunaarutaanni erseqqilluinnartumik allassimasoqarpoq kikkut aalisarsinnaanermut akuersissummik tunineqarsinnaanersut.

Nalunaarummi sineriammut qanittumi aalisarsinnaanermut akuersissutinik tunniussisarnermut ilaatigut ima allassimasoqarpoq:

Pisassiissutigineqartunit pisarineqarsinnaasut amerlassusaat aamma pisaqarsinnaassuseq. Qinnuteqartoq Aalisarnermut Piniarnermullu Ilinniarfimmi imarsiornermik ilinniagaqarsimanersoq imaluunniit allatigut assingusumik piginnaasaqalersimanersoq. Aamma qinnuteqartoq sinerissamut qanittumi aalisarnermi ukiuni marlunni ataannartumik inuttatut aalisartuusimanersoq.

Kommunit aalisarsinnaanermut akuersissutinik siorna tunniussisanngikkallarmata Aalisarnermut Piniarnermullu Naalakkersuisoqarfiup umiatsiaararsorluni aalisarsinnaanermut akuersissutit siorna tunniussai 5.585-iupput, sinerissap qanittuani aalisariutinut akuersissutit 853-it aamma tunniunneqarlutik.

Aalisarsinnaanermut akuersissutit ukioq manna tunniunneqartut 4.854-iupput, aalisariutinut 799-it tunniunneqarlutik. Kommunit akuersissutit tunniussaat 3.000-iupput. Taamaalilluni Naalakkersuisoqarfiup sinerissap qanittuani aalisarsinnaanermut akuersissutit tunniussai 1.854-iupput. Nalunaarummi piumasaqaatigineqartunut naammassinnissimanngitsunut Naalakkersuisoqarfiup tunniussaralugit.

Sermitsiaq.AG-mi juulip 21-anni allaaserineqartumi Naalakkersuisoqarfimmi sulisut ilaat oqarpoq immikkut akuersissutinik Naalakkersuisoqarfimmit saaffiginnissutit utaqqisut 600-t missaanniissasut tagginneqassappata kukkuneruallaassanngitsoq.

- Sinerissap qanittuani aalisarsinnaanermut akuersissutinik qinnuteqarsimallutik utaqqisut amerlasoorsuartut isigineqarsinnaapput. Amerlasuutut isigineqarsinnaalerput qinnuteqartut emailikkut kommunillu internetikkut sullissivia aqqutigalugu qinnuteqaataat ataasiaannaratik qinnuteqartutut allassimasuulersarmata.

- Isumaqarpunga immikkut akuersissummik tunineqarnissaminnut utaqqisut amerlassusaasa oqaatigineqarnerinit pingasoriaammik ikinnerunissaat oqaatigissallugu eqqortuunerussasoq, Aalisarnermut Piniarnermullu Naalakkersuisoqarfimmi pisortaaneq, Jørgen Isak Olsen, erseqqissaavoq.

Akuersissutaatillit amerlassusaat

Sinerissap qanittuani saarullinnut, qaleralinnut, nipisannut, assagiarsunnut kapisilinnullu aalisarsinnaanermut akuersissuteqartut ima amerlatigipput.

  Umiatsiaaqqat
Aalisariutit
2015
 4368  758
2016
 5585  853
2017, juuli
 4854  799

Attavigineqarsinnaavoq Aalisarnermut Piniarnermullu Naalakkersuisoqarfimmi pisortaaneq, Jørgen Isak Olsen. Mail: jio@nanoq.gl