Pisariaqartitavut pigereerpavut: Qaanaami avatangiisinik saleersuarneq

Qaanaami saleersuarneq aallartippoq. Naalakkersuisut Qaanaami suliniutinik immikkut ittunik arlalinnik aallartitsipput. Suliniuteqarfiit ilaattut Qaasuitsup Kommunia, eqqagassalerinermi akisussaasuusoq suleqatigalugu Qaanaami eqqaavissuup salinneqarnissaa qulakkeerneqassaaq.

”Qaanaami, Qaasuitsup Kommuniata eqqaavilerinerup anartarfilerinerullu torersumik isumagineqarnissaanik qulakkeeriffigisassaani immikkut ittumik suliniuteqarnissaq pisariaqarpoq. Eqqagassalerinermi pissutsit torersuunissaasa qulakkeerneqarnissaat suliassaavoq pingaarutilik. Taamaattumik Naalakkersuisut kommunit eqqagassalerinermik naleqquttumik pilersitsiniarneranni tapersersussallugit piareersimapput, kisiannili kommunit namminneerlutik suliassanut akisussaaffeqarfigisaminnut pilersaarusiornissaat aningaasanillu naammattunik tulleriiaarisinnaanissaat pisariaqarpoq. Kommunit ineriartorneq ilutigalugu eqqagassalerinerminnik piareersaasariaqarput. Oqaatigineqareersutut Naalakkersuisut ikiuinissamut piareersimapput, tamattalu annertuumik suliniuteqarsinnaagutta pisariaqartitavut pigereerpavut”, Naalakkersuisut siulittaasuat Kim Kielsen oqarpoq.

Ukioq manna umiarsuaq siulleq atortussanik pisariaqartinneqartunik nassarluni Qaanaamut tikippoq, maannalu illoqarfimmi eqqakkat qimaannakkat eqqaavissuullu salinneqarneri kiisami aallartissinnaalerput. Namminersorlutik Oqartussaniit 750.000 koruunit Qaanaami saliinissamut immikkoortinneqarput. Taamatuttaaq Qaasuitsup Kommunia saliinerup aningaasalersorneqarnissaanut tapiissuteqassaaq.

”Qaasuitsup Kommunia ukiuni kingullerni – Pinngortitamut Avatangiisinullu Naalakkersuisoqarfik suleqatigalugu – Aasianni, Qeqertarsuarmi, Qasigiannguani Ilulissanilu saliivoq. Kommunip illoqarfiisa sinnerini saliinissaq ukiup kingulliup ingerlanerani pilersaarusiorneqarpoq, Qaasuitsullu Kommuniata ukioq manna 4 mio. koruunit eqqaavissuarnik saliinissamut immikkoortippai, taakkuninngalu atuilluni maanna Qaanaaq aallartinneqarpoq. 4 mio. koruunit, saliinissamut immikkoortinneqartut saniatigut aamma 3,5 mio. koruunit ikuallaavinnik aaqqiissutissanilluunniit assingusunik nutaanik pisinissamut immikkoortinneqarput. Pinngortitamut Avatangiisinullu Naalakkersuisoqarfik suleqatigalugu Qaanaami ikuallaavimmik nutaamik pilersitsisinnaanissamut imaluunniit eqqakkanik Qaanaamiit illoqarfimmi allami ikuallaavimmut annerusumut assartuisinnaanissamut periarfissat misissuiffigaagut.

Kommunip eqqagassalerineranik nalunaarsuinermi takutinneqarpoq, ilaatigut Qaanaami, Upernavimmi Uummannamilu eqqagassat ajornartorsiutaanerat innuttaasut peqqissusaannut toqqaannartumik ulorianaateqarsinnaasoq, taamaattumillu eqqagassalerinermi aaqqiissutissanik nutaanik nassaarnissaq pingaaruteqartoq. Qaasuitsup Kommunianit Pinngortitamut, Avatangiisinullu Naalakkersuisoqarfiup suleqatigineqarnera, aammalu kommunit akunnitsinni suleqatigiinnerput nuannaarutigineqarpoq”,
Qaasuitsup Kommuniani borgmesteri Ole Dorph oqarpoq.

Eqqagassat aasaq manna kingusinnerusukkut umiarsuup tullianut kingullermullu ilaatinneqarsinnaanissaat siunnerfigineqarpoq

Annertunerusumik paasisaqarusunnermi immikkoortortaqarfimmi pisortaq Karen Anne Arleth tlf. nr. 345465 imaluunniit mail knar@nanoq.gl aqqutigalugu attaveqarfigineqassaaq.