Aningaasaliissutit Nuugaatsiami Illorsuarnilu piniartunut aalisartunullu iluaqutissatut atorneqassapput

Stemningsbillede Røde Korsip, Qaasuitsup Kommuniata Naalakkersuisullu allaffeqarfianit aallartitat ataatsimiinneranni 19. juli 2017-imi inaarutaasumik uppernarsarneqarpoq, Nuugaatsiarmiut Illorsuarmiullu inuussutissarsiorlutik aalisartut piniartullu umiatsiaaqqanik piniutinillu annaasaannik taarsiivigineqarnissaannut pisiortorneq aallarteriaannanngortoq.

Isumaqatigiissutigineqarpoq, Qaasuitsup Kommunia umiatsiaaqqanik atortunillu pisiniassasoq, aningaasallu katersorneqartut tunniunneqartullu atorlugit Røde Korsip aningaasartuutigissagai.

Inuussutissarsiorlutik aalisartut piniartullu inuussutissarsiornerminnik sapinngisamik piaartumik aallartitsisinnaanissaat pillugu pisiniarnerit sapinngisamik piaartumik naammassiniarneqassapput.

Atortunik annaaneqartunik il.il. pisiniarneq pissaaq, ajunaarnersuarmit eqqugaasunik pisup kingorna Qaasuitsup Kommuniata inuussutissarsiorlutik aalisartunit piniartunillu paasissutissat katersorsimasaat tunngavigalugit. Matumani annaaneqartunut sanilliullugit aningaasanik katersorneqartunik tunissutigineqartunillu akissaqartinneqartut pingaarnersiorneqassapput.

Naalakkersuisut kiisalu Qaasuitsup Kommunia, minnerunngitsumillu innuttaasut eqqugaasut sinnerlugit Røde Korsimut aammalu tapiissuteqarsimasunut, suliniummik matuminnga piviusunngortitsisunut qujangaarpugut.

Inuussutissarsiorlutik aalisartut piniartullu Nuugaatsiarmiut Illorsuarmiullu umiatsiaaqqanik atortunillu taarsiinissaq pillugu apeqqutissaqarunik Qaasuitsup Kommunianut saaffiginnissinnaapput.



Inussiarnersumik Inuulluaqqusilluta

Aqqaluaq B. Egede
Aningaasaqarnermut Akileraartarnermullu     
Naalakkersuisoq
   Ole Dorph
   Qaasuitsup Kommuniani borgmesteri 





Attavigiuk:
Nikolai S. Christensen
Toqq/direkte 346675
nsch@nanoq.gl