Ilinniagaqarnersiutit pillugit nalunaarut nutaaq

Ilinniagaqarnersiutit pillugit nalunaarut nutaaq ilinniagaqartunut malunnaatilinnik pitsanngoriaateqartitsivoq

Naalakkersuisut akuersissutigaat ilinniagaqarnersiutit pillugit nalunaarut nutaaq 1. august atortuulertussaq. Nalunaarut maleruagassanik atuuttuusunik tunngavilimmik suliaavoq, kisiannili aaqqissuuteqqinneqarluni ilinniagaqartunut pitsanngoriaatitalinnik malunnaateqarluartussanik.

Immikkut malugineqassaaq qaammatikkaartumik ilinniagaqarnersiutit - stipendiat -akilerneqartarnerisa allanngortinneqarneri, kingumoortumik akiliisarnermiit siumoortumik akiliisarnermut. Allannguinerup nutaamik ilinniagaqalertut ikiussavai, misilittakkat naapertorlugit taakkua aningaasaqarnikkut ilinniarnerup qaammataani siullerni ajornakusoortumik inissisimasaraluarmata.

"Naalakkersuisooqatigiinnermut isumaqatigiissutikkut aalajangersarsimavarput inuusuttunut atugassarititaasut killiliussat pitsaanerulersinneqassasut, nunatsinni namminermi nunaniluunniit allani ilinniagaqarsinnaaneq eqqarsaatigalugu. Taamaattumik nuannaarutigaara ilinniagaqarnersiuteqarnermut nalunaarut nutaaq maanna atortuulermat” - oqarpoq Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq, Doris J. Jensen.

Ilinniagaqarnersiuteqarneq pillugu nalunaarummi nutaami allannguutit:

- Qaammatikkaartumik siumoortumik ilinniagaqarnersiutit
- Tapiissutit qaffasinnerusut aamma attartornissamut periarfissat ilinniakkamut akitsuummik akiliinissamut
- Ungasissumiittutut ilinniakkamik ingerlatsinermut ilinniagaqarnersiuteqarsin-naanermut periarfissaqalerneq.
- Ilassutitut atuartitaanermut tapiiffigineqarnissamut periarfissaqalernera Kalaallit Nunaata avataani ilinniagaqartunuinnaanngitsoq.
- Akiliunneqarluni angalasarnermut malittarisassat eqaannerulersinneqarput siunnerfilerneqarlutillu.

Kiisalu aamma nalunaarut imaqarpoq malittarisassanik tapiissuteqarsinnaanermut pe-riarfissaqartitsisunik ingerlatsinernut ilinniagaqarsinnaanermut piginnaasanik siuarsaanernut, aamma ilinniakkamik naammassinninniartarnernut tunngatillugu. Tamanna assersuutigalugu atuuppoq aasaanerani atuarnernut Danmark-imi ilinniagaqartut eqqarsaatigalugit, ilinniarnerup aallartinnissaa sioqqullugu ingerlatsinerni.

”Anguniagaraarput qularnaassallugu nunatsinni innuttaasut ilinniarluarsimasuunissaat taamalu ilinniarluarsimasunik imminut pilersortunngornissarput, ilinniagaqarnersiuteqar-nermullu nalunaarutikkut nutaakkut nukittorsassavarput ilinniagaqartut ilinniakkanik tapiiffigineqarsinnaasunik naammassisaqartarnissaat” – naggasiilluni oqaaseqarpoq Naalakkersuisoq Doris J. Jensen.

Ersarinnerusunik paasisaqarniartunut innersuunneqassaaq immikkoortortami pisortaq Karsten P. Jensen oqarasuaammi 34 56 83