Ineqarnermut akiliutit 2018-imi qaffatsinneqassanngillat

Namminersorlutik Oqartussat attartortittakkatut inissiaataanni ineqarnermut akiliutit 2018-imi qaffatsinneqassanngillat

Naalakkersuisup Erik Jensenip Namminersorlutik Oqartussat najugaqarfiutaanni ineqarnermut akiliutit 2018-imi nikisinneqassanngitsut, taamaalillunilu ineqarnermut akiliutit qaffanneqassanngitsut A/S Inissiaatileqatigiiffik INI-mut nalunaarutigeqqullugu allaffeqarfini qinnuigaa.

Naalakkersuisoq Erik Jensen oqarpoq: ”Namminersorlutik Oqartussanut attartortut ineqarnermut aningaasartuutissaminnik ilisimasaqarnissaat pingaaruteqarpoq. Taamaattumik ukiuni tulliuttuni ineqarnermut akiliutit qaffasissusissaasa sapinngisamik siusissukkut nalunaarutigineqartarnissaat pingaaruteqarpoq. Namminersorlutik Oqartussat najugaqarfiutaanni ineqarnermut akiliutit 2018-imi qaffanneqassanngillat. Naalakkersuisut ineqarnermut pilersaarutinik suliaqarnerat tamatumunnga peqqutaavoq. Oquiaanermi suliniutit annertusineqarnerisa aammalu Namminersorlutik Oqartussat inissiaataannut, aningaasanut inatsimmi aningaasaliissutit aqqutigalugit aningaasalersorneqartunut aserfallatsaaliuinermut aningaasaliissutit amerlineqarnerisa sunniutaat takuniarlugit, immikkoortumut pilersaarutinut inassuteqaatit kingunerisassaasa naliliiffigineqarsinnaanissaat pingaaruteqarpoq.”

Kiisalu Naalakkersuisut attartortitsisarnermut peqqussummik nutaamik suliaqarput, Inatsisartut 2018-imi ukiakkut ataatsimiinneranni Inatsisartunut saqqummiunneqartussamik. Suleqatigiissitamik pilersitsisoqarpoq – aallaqqaammut Namminersorlutik Oqartussanit kommuninillu peqataaffigineqartussamik. Siunissami suleqatigiissitaq assigiinngitsuniit suleqataaffigineqalissaaq, tassani suliassaqarfiit suut suliarineqarnerat apeqqutaassalluni.

Suleqatigiissitap aallaqqaammut pisortat inissiaataannik piginnittoqarneq misissuiffigissavaa. Naalakkersuisoq Erik Jensen oqarpoq: ”Pisortat inissiaataat attartortittakkat pineqartillugit ukiuni tulliuttuni piginnittoqarnermut tunngasunik suliniuteqarluarnissap pingaaruteqartorujussuusussaanera qularinngilara. Inissiarpassuit iluarsaanneqartussaapput, ilaat isaterneqartussaapput aammalu inissianik nutaanik sanaartortoqartussaavoq. Taamaattumik attartortitsisarnermut peqqussutissami piginnittut pisussaaffissaasa nassuiarneqarnissaat, taamaalillunilu inissiat siunissami isumagineqarsinnaanissaat pingaaruteqarpoq. Taakku saniatigut attartortut pisussaaffii nassuiarneqassapput, taamatullu attartortut pisinnaatitaaffii aamma illersorneqassapput. Aamma pisortat inissiaataasa pitsaasumik ingerlanneqarnissaat siuarsarniarlugu allaffeqarfiga qinnuigaara ineqarnermut akiliutit katitigaanerat misissuiffigeqqullugit. Attartortitsisarnermut inatsisip nutaap saqqummiunneqarnissaanut suliassat qilanaarisorujussuuakka.

Tusagassiorfinnut nalunaarut manna pillugu allanik apeqqutissaqartoqaruni naalakkersuisumut allattaagallartoq Elisabeth Fleischer oqarasuaat normu 56 41 11-ikkut imaluunniit elif@nanoq.gl-ikkut attaveqarfigineqarsinnaavoq.