Peqqinnissaqarfimmi nakorsatut qullersanngorlaaq

Peqqinnissaqarfimmi nakorsatut qullersanngorlaaq tassaavoq Assia Brandrup-Lukanow
Glostrup-imi gigtimut qiterluutinullu immikkut paasisimasaqarfimmeersuuvoq inuiaqatigiinnilu pissutsit tunngavigalugit nappaateqalersarnermut tunngasut nakorsaanerlu ukiorpanni misilittagaqarfigalugit

- Assia Brandrup-Lukanow-ip nakorsat qullersaattut atorfininnera nuannaarutigeqaara. Ilinniagaqassutsikkut piginnaaneqarluartuuvoq suliffeqarfinnullu politikkikkut aqunneqartunut piginnaaneqarnermigut inerisaarusussuseqarnermigullu napparsimasut sulisullu ajunngitsumik atugaqarnissaat qitiutillugu peqqinnissaqarfiup inerisartuarneqarnissaanut pitsaasumik tunniussassaqassaaq, Malene Marie Nielsen Aqutsisoqarfimmi pisortaq oqarpoq.

Assia Tysklandimeersuuvoq tarnip pissusaanik immikkut ilinniagaliulluni inuiaqatigiinnilu pissutsit tunngavigalugit nappaateqalersarnermut immikkut ilisimasalittut ilinniaqqissi-malluni. Ukiorpanni aqutsinermik misilittagaqartuuvoq ilaatigullu ukiuni arlertuni WHO-p ilaqutariit peqqissusaannut tunngatillugu immikkoortuata, IPPF-ip (Det internationale forbund for forældreskab) Europap Kangiani suliniutinut immikkoortua kiisalu GIZ-ip (Det tyske agentur for internationalt samarbejde) peqqissutsimut, ilinniartitaanermut inuttullu atukkatigut illersugaanermut immikkoortua aqutarisimallugit. Tamatuma saniatigut ilaatigut Københavnip Universitetiata LIFE Fakultetiani Sygehus Syd-imilu suliniummut aqutsisuuvoq, Deutsche Klinik for Diagnostik, Bornholmip napparsimmavia, Bornholmimi meeqqanut inuusuttunullu tarnimikkut nappaatilinnut immikkut nakorsiartarfik nakorsatut suliffigai. Assia Gråsten-imiittumi Kong Christian X Gigtertunut napparsimmavimmissaaq nakorsatut sulisimavoq 2016-imilu aasakkut Peqqinnissaqarfik Kujataani nakorsatut taartaalluni sulilluni.

Peqqinnissaqarfimmi nakorsat qullersaattut atorfinerlaaq Assia Brandrup-Lukanow sap. ak. uani takkuppoq suliffeqarfiullu aaqqisuussaanera, suleqatit, sulisut suleriaatsillu pillugit paasiniaalluni aallartilluariivilluni.

- Tikilluaqqusaalluarpunga. Kalaallit Nunaanni Peqqinnissaqarfik ass. qarasaasiakkut nakorsiartitsisarnermut tunngatillugu siuarsimaqaaq Peqqinnissaqarfiup - innuttaasut toqqissinartumik qaffasissumillu pitsaassusilimmik sul-linneqarnissamik pisariaqartitaannut naapertuuttumik - siunissamut eqqanaarnissaanut peqataanissaq qilanaaraara, Assia Brandrup-Lukanow oqarpoq.

Assia marlunnik aappaa ilinniarnertuunngorniartumik aappaalu universitetimi atuartumik 17-inik 21-inillu ukiulinnik paneqarpoq. Panii Qaqortumeeqataapput, Nuummullu tikeraarnissartik qilanaaraat.

 

Tusagassiorfinnut nalunaarut una pillugu paasisaqarnerunissamut attavigineqassaaq peqqissaasut qullersaat Ella Skifte e-mail ella@peqqik.gl.