Inuttaasunik ataatsimiisitsinerit

Naalakkersuisunut ilaasortat pingasut Aasiaat Kangaatsiallu eqqaanni nunaqarfinni angalapput

Ulluni 12.-15. Juuli 2017, Naalakkersuisunut ilaasortat ukuusut, Aalisarnermut Piniarnermullu Naalakkersuisoq, Karl-Kristian Kruse, Kommunenut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoq Erik Jensen kiisalu Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq, Doris J. Jensen, Kangaatsiaq nunaqarfiillu Attu, Ikerasaarsuk, Iginniarfik, Niaqornaarsuk, Aasiaallu eqqaani nunaqarfiit Kitsissuarsuit, Akunnaaq kiisalu Ikamiut tikeraarpaat inuttaasunillu ataatsimiisitsisarlutik.

Innuttaasunik ataatsimiisitsinerit ataatsimut isigalugu soqutigineqarluarput, innuttaasullu atukkatik pillugit Naalakkersuisunut apuussassaqarluarput apeqquteqaqattaarlutillu.

Sumiiffinni tamani inuussutissalerinermut tunngasut apeqqutigineqakkajupput, assersuutigalugu tunitsivissanik amigaateqarneq qanorlu iliuuseqarfigineqarniarnersoq. Tunisassiorfinni angerlarsimaffinnilu ataasiakkaani tamani imeqarniarnerup ajornartorsiutaanera, piaarnerpaamillu aaqqinneqartariaqartoq eqqaaneqarput. Talittarfeqarfiit ullutsinnut naleqqukkunnaarsimasut, sumiiffinnilu taakkunani angallannerup qanoq innera aamma Oqariartuutigineqarputtaaq.

Ilinniartitaanermut kultureqarnermut Ilageeqarnermullu tunngasut innuttaasunit taakkartorneqarput, assersuutigalugu Kangaatsiami atuarfiup aserfallassimanerujussua, Ikerasaarsummi atuarfiup oqaluffiutiginerata, Attumilu oqaluffiup aserfallassimanera, ilagiinnullu atugassarititaasut kipiluttunassusaat ataatsimiinnermi eqqaaneqarput Naalakkersuisunullu apuunneqarlutik.

Periarfissaq atorluarlugu Naalakkersuisunut ilaasortat sulianut pineqartunut tunngassuteqartut killiffii, kiisalu siunissamut pilersaarutit pillugit innuttaasunut saqqummiipput.

“Nuannaarutigaarput aasarisseruttornerani angalanitsinni innuttaasunit tikilluaqqusaalluarnerput, innuttaasullu tikivillugit oqaloqatiginerat atugaasalu nammineq isitsinnik takunerat uagutsinnut isumalerujussuuvoq. Innuttaasut apuukkumasaat tusarnaarluarpagut paasiniagassallu paasiniarlugit, kiisalu aaqqiissuteqartoqarnissaanut pilersaarutaareersut saqqummiuppagut, siunissamilu aaqqiissutaasinnaasunik ujartuissalluta”; taamatut Naalakkersuisunut ilaasortat ataatsimut oqaaseqaateqarlutik nalunaaruteqarput.

Tikiffinni tamani ersarissumik innuttaasut ilaatigut ujartuiffigiuagaat tassaasarpoq kommunip akisussaaffigisaasa annertuut annerusumik iliuuseqarfigineqartarsimannginneri pillugit oqariartuuteqarnerit. Tamatumani aqquserngit, illuuterpassuit aserfallattut kommunillu ataani suliffeqarfiit soorlu qatserisartoqarnermi upalungaarsimanermilu pissutsit taakkartorneqartarlutik.

Pissutsit pineqartut kommunimut apuunneqarnissaat isumaqatigiissutaavortaaq.

 

Sukumiinerusumik paasisaqarusukkaanni saaffissaq: Naalakkersuisoqarfimmi pisortaaneq Jørgen Isak Olsen, jio@nanoq.gl 345000