Uummannap eqqaani tassaarnersuaqarnerani eqqugaasunut ikiuukkumaneq pitsaasoq

Ataatsimoorussamik tusagassiorfinnut nalunaarut: Kaalallit Røde Korsiat, GrønlandsBANKEN, Bank Nordik, TelePost aamma Namminersorlutik Oqartussat

Uummannap eqqaani tassaarnersuaqarnerani eqqugaasunut Kalaallit Røde Korsiata suliniuteqarneratigut 2,5 mio. kr.-ningajaat katersorneqarsimapput.

Uummannap eqqaani 17. juni 2017-imi tassaarnersuaqarnerani eqqugaasunut tapersersuiniarlutik ikiuukkumasorpassuit takullugit nuannaarutigisorujussuuarput. 

Kalaallit Røde Korsiat Røde Korsimi immikkoortortanit allanit, suliffeqarfinnit kattuffinnillu, matumani Air Greenlandimit, Sigguk A/S-imit, Kalaallit Sulisitsisuannit aamma Røde Kors Savalimmiuneersumit manna tikillugu neriorsortippoq 665.000 kr.-inik tunineqassasoq.    Tassunga aamma Qallunaat Røde Korsiata aamma Islandermiut Røde Korsiata katersaat qanoq amerlatiginerannik suli nalunaarutigineqanngitsut ilanngunneqassapput.

Taakku saniatigut Grønlandsbanken, BankNordik aamma TelePost 1,7 mio. kr.-ningajaat innuttaasunit suliffeqarfinnillu namminneq kajumissutsiminnik tuniserusuttunit katersisimapput.  Tunissutit Kalaallit Røde Korsiannut ingerlateqqinneqarumaarput.

Kalaallit Røde Korsiata suliniutaa Qaasuitsup Kommunia aamma Kalaallit Nunaanni Namminersorlutik Oqartussanik suleqateqarnikkut ataqatigiissarneqarpoq.  Innuttaasut eqqugaasut nalinginnaasumik inooqqilernissaannut suliniummi pingaarnertut isiginiarneqarpoq.  Ikiorsiiniarnermi suliassanik isumaginninnissanut, assersuutigalugu meeqqanut sammisassaqartitsinissanut, atisanut pequtinillu ikiorsiisoqarnissaa naatsorsuutigineqarpoq.  

Kaalallit Røde Korsianni siulittaasoq Christina Tønder Bell ima oqaaseqarpoq: ”Tassaarsuartoqarnerani eqqugaasunik ikiuinissamut soqutiginnittorpassuit takullugit Kalaallit Røde Korsiata uummatikkut nuannaarutigaa.  Piffissap sivikitsuinnaap iluani maanngaanniit nunattalu avataaniit aningaasarpassuarnik katersisoqarpoq, taamaalillutalu aamma maluginiarparput nammineq kajumissutsimik sullissinitsinnut ikiuukkumasut amerleriartut.  Tamanna qujamasuutigeqaarput namminnerlu kajumissutsiminnik ikiuukkumasut nutaat tamaasa uatsinnut uummammik pisumik tikilluaqqugaarpagut”.

Grønlandsbankenimi pisortaaneq Carsten Th. Pedersen ima oqaaseqarpoq” GrønlandsBANKEN Kalaallit Nunaanni najugaqarpoq, taamaammat aamma pissusissamisuuginnarpoq immikkut pisumi najukkami ikiuiniartoqarnerani peqataanissarput. Tamaani inuiaqatigiinni misigaarput eqqugaasunut atorneqartussamik kontomik piaartumik pilersitsisoqarnissaanik kissaateqartoqartoq.  Soorunami taamaaliorsimavugut, tamatumalu kingorna takullugulu malugaarput kontomut assorsuaq tapersersuisoqartoq.  Tamanna Kalaallit Nunaanni innuttaasut tamarmik, nunatsinniit avataaniillu tapersiisut tulluusimaarutigilluarsinnaavaat.”

Bank Nordikimi Inuussutissarsiutinut pisortaq Thomas ’Tyt’ Mogensen ima oqaaseqarpoq”Tapersiinitsigut neriuutigaarput ajunaarnersuarmik eqqugaasut ulluinnarni inuunerminnut sapinngisamik piaarnerpaamik uteqqissinnaassasut.  Ajunaarnersuarmi pingaartumik qimagaasut uummatitsinniitippavut.”

TelePostimi attaveqaqatigiinnermi pisortaq Arnakkuluk Jo Kleist ima oqaaseqarpoq”Internetsip oqarasuaatillu angallattakkat atugaalluarnerisa nunatsinnik ataatsimoortitsinissamut nutaanik periarfissiivoq. Tamanna SMS-ikkut katersinitsinni nunatsinnit tamarmik tapiisoqarsimasoq takusinnaavarput. Innuttat amerlasuut teknologiip nutaap taassuma ajunngitsumik atoraat takullugu nuannaarutigisorujussuuarput”

’Innuttarpassuit ilaat sunik tamanik pigisaminnik annaasaqarlutik inissittarput.  Inunnut taakkununnga eqqortunut eqqortumik ikiorsiinissaq pingaaruteqartorujussuuvoq.  Taamaammat Kalaallit Røde Korsiat pisortallu ikioqatigiillutik suliniaqatigiinnerat pitsaalluinnartuuvoq’, taama naggasiivoq Naalakkersuisoq Aqqaluaq B. Egede, taassumalu innuttaasut, suliffeqarfiit, peqatigiiffiit allallu nunatsinneersut nunattalu avataaneersut tapersiisut, soorlu nammineq kajumissutsiminnik ikiuullutik imaluunniit katersuiniarnermi aningaasanik tapersiillutik ikiuuttut immikkut tamaasa qujassuteqarfigai. 

 

Christina Tønder Bell     Carsten Th. Pedersen  Thomas ’Tyt’ Mogensen  Arnakkuluk Jo Kleist

Aqqaluaq B. Egede

 

Paasissutissanik allanik pisariaqartitsiguit qulaani suliffeqarfiit aamma Namminersorlutik Oqartussat oqarasuaatitigut ukunatigut attavigineqarsinnaapput: 

1. Kaalallit Røde Korsiat Siulittaasoq Christina Tønder Bell, +299 555 642, formand@krk.gl

2. GrønlandsBANKEN Attaveqaqatigiinnermik siunnersorti Ulrik Stenius, +299 347879, us@banken.gl

3. Bank Nordik Inuussutissarsiornermi pisortaq Erhvervsdirektør Thomas ’Tyt’ Mogensen, +299 347940, tyt@banknordik.gl

4. TelePost Attaveqaqatigiinnermi pisortaq Arnakkuluk Jo Kleist, +299 547854, ajk@telepost.gl

5. Namminersorlutik Oqartussat Immikkoortortaqarfimmi pisortaq Lise Sand Ellerbæk, +299 346681, liel@nanoq.gl