Kujataa Nunarsuarmioqatigiit kingornussaannik allattuivimmut ilannguteqammerpaa

UNESCO-mi nunarsuarmioqatigiit kingornussaat pillugit komitep Kalaallit Nunaanni kulturikkut nunap ilaa Kujataa Nunarsuarmioqatigiit kingornussaannik allattuivimmut ilannguteqammerpaa

Kalaallit Nunaata Kujataani nunalerinermi kulturikkullu nunap ilaa kusanartoq UNESCO-p nunuarsuarmioqatigiit kingornussaannik allaatuiffimmut ilannguteqammerneqarpoq. Taamaalilluni nunarsuarmi kulturikkut pinngortitamilu sumiiffiit, aamma tassunga ilaallutik Grækenlandimi Akropolis, Kinami Kinap Qammarsua, Danmarkimi Christiansfeld, Philippinerini risterraserne kiisalu Ilulissat Kangerluat kusarnatut 1050-it sinnerlugit akornanniliipoq.

Qinnuteqaat kiisami komitemit suliarineqarnera nunarsuarmioqatigiillu kingornusaannut ilanngunneqarnera pillugu nutaarsiassaq nuannersoq Kultureqarnermut Naalakkersuisup Doris Jakobsenip tigoqqammerpaa. Ilanngussinermi Kalaallit Nunaanni sumiiffiit marluk UNESCO-p nunarsuarmioqatigiit kingornussaannik allattuiffimmiilerput, Kulturimullu Naalakkersuisoq Doris Jakobsen neriuppoq akuersineq nunarsuarmioqatigiit kingornussaattut Ilulissatut Kangerluattut pitsaatigisumi kinguneqassasoq.

Sumiiffik nunarsuarmioqatigiit kingornussaat Kujataa 350 kvadratkilometerit missaanni angissuseqarpoq, tassaallutillu Tunulliarfiup eqqaani kangerlunni sumiiffiit ilaat tallimat, Igalikullu Kangerlua. Sumiiffiit tassaapput: 1. Qassiarsuk, 2. Igaliku, 3. Sissarluttoq, 4. Tasikuluulik og 5. Qaqortukulooq-Upernaviarsuk, qeqertaq Arpatsivik ilanngullugu.

Davisstrædep sermersuullu akornanni nunap ilaani qallunaatsiat najugaqarfigisimasaanni paarilluakkanik illoqartoq inuiaqatigiillu Inuit 1700-kkuni nutaaliaasumik inooriaaseqarlutik nunalerinermik aallartitseqqisimanerat nunarsuarmioqatigiit kingornussaat pillugit komitep isumaliuteqarnermini pingaartippai.

Kujataa pillugu annertunerusumik uani atuarit

(http://naalakkersuisut.gl/da/Naalakkersuisut/Naalakkersuisoqarfiit/Ilinniartitaaneq-Kulturi-Ilisimatusarneq ilageeqarnernlu aamma Ilageeqarneq/Kulturi aamma Ilageqqarneq/Kulturi/Kulturikkut kingornussat)

(http://slks.dk/verdensarv/nye-forslag-tentativlisten/kujataa-et-subarktisk-landsbrugsomraade-i-groenland/)

Naalagaaffeqatigiiffimmi sumiiffiit nunarsuarmiut kingornussaat pillugit annertunerusumik uani atuarit

(http://slks.dk/verdensarv/verdensarv-i-danmark/)

Annertunerusumik paasisaqarusukkuit: Naalakkersuisup allattaa Rosa Thorsen, E-mail: rosat@nanoq.gl, tlf. 55 33 03