Tassaarsuartoqarnerata kingorna inuit pigisaannik aallernissamut piareerput

Nuugaatsiami Illorsuarnilu tassaarsuartoqarnerata kingorna Sakkutooqarfik aamma Qaasuitsup Kommunia inuit pigisaannik aallernissamut piareerput

Namminersorlutik Oqartussat Qaasuitsup Kommunianut isumaqatigiissuteqareernerminni Nuugaatsiami Illorsuarnilu pissutsinut arlalinnut qulakkeerinissamut ikiorseqqullutik Illersornissamut Ministereqarfimmut qinnuteqarput. Nunaqarfinnit inuit pigisaannik aallertoqarnissaanut, Nuugaatsiap eqqaani imaani illukunik pigisanillu annerusunik saliinissamut aammalu ullormoortumik nakkutilliisoqarunnaarnissaa eqqarsaatigalugu nunaqarfinni pissutsinik pisariaqarnerpaanik isumannaarinissamut isumannaallisaanikkut illersorneqarsinnaasumik ikiorsiisoqarnissaa qinnutigineqarpoq.

Illersornissamut Ministereqarfiup ikiorserneqarnissamik qinnuteqaat akueralugu nalunaarutigaa. Taamaattumik Issittumi Sakkutooqarfiup Qaasuitsup Kommunia aamma Namminersorlutik Oqartussat suleqatigalugit suliniuteqarnissaq pilersaarusiorlugu aallartippaa, taamaalilluni suliassat isumannaallisaanikkut illersorneqarsinnaasumik suliarineqarsinnaassammata.

Pinngortitami ajunaarnersuup kingorna saliinissaq Qaasuitsup Kommuniata aamma Namminersorlutik Oqartussat akisussaaffigaat. Tamanna tunngavigalugu Illersornissamut Ministereqarfiup ajunaarnersuup pereernerani suliniuteqarnerup kingorna suliassanut ikiuunnerminik ingerlatitseqqinnissaa immikkut nuannaarutissaavoq annertuumillu iluaqutaasussaalluni.

Suli qaqqap sisooqqinnissaa ulorianartorsiorfiuvoq, illut ilaat immamut amuneqarsimapput aammalu illut nunamiittut ilaat annertuumik ajoqusersimallutik. Tamanna pissutigalugu suliassaq, Sakkutooqarfiup aamma kommunimi upalungaarsimasut ikiuuffigissallugu misilitassaat isumannaallisaanikkut ajornakusoortuuvoq.

Qaqqap sisooqqissinnaaneranut ulorianartorsiorneq peqqutigalugu aamma inuit namminneerlutik pigisaat, siullermik aallerluni misiliinermi sukkasuumik tiguneqarsinnaasut tassaapput innuttaasunut immikkut naleqartutut naliliiffigineqartut. Tassaasinnaapput kalaallisuut, pinnersaatit, sakkut, assit assigisaallu. Pigisanik aallernissap misilinneqarnissaa sioqqullugu innuttaasut ataasiakkaat, Sakkutooqarfimmit aamma kommunit upalungaarsimasuinit angerlarsimaffimmut isertoqarsinnaaneranut aammalu pigisat ilaannik annaassiniarlutik misiliisinnaanerannut akuersissutinik atsiugaqassapput. Suliap ingerlanera tamakkerlugu inuit suliaqartussat isumannaallisaaneq eqqarsaatigalugu ulorianartorsiunnginnissaat pingaarnerpaatinneqassaaq. Taamaattumik innuttaasut eqqugaasut tamakkerlutik ikiorneqarsinnaanissaat qulakkeerneqarsinnaanngilaq, kisiannili misiliisoqassaaq. Kommunimi upalungaarsimasuni suliniuteqarnermi pisortat aamma suliassamut ikiuutissapput, aammalu najukkani kommunefogedit pisariaqartillugu ajornartinnagulu illut tassaarsuup kingorna inigisaminiikkunnaarsimasut sumiiffissiniarneqarnerini ikiuutissapput.

Sakkutooqarfimmiit aamma kommunimi upalungaarsimasuniit pigisanik aallerniarluni misiliisoqannginnerani innuttaasut qimagutsinneqartut akuersissummut atsiortinniarlugit Qaasuitsup Kommunianit toqqaannartumik attaveqarfigineqassapput. Aamma umiatsiat aalisarnermullu atortut suli atorsinnaasut tiguneqarnissaat misilinneqassaaq, taakkulu piginnittunut tunniunneqassapput.

Nuugaatsiaq aamma Illorsuit suli ulorianartorsiorfiummata, inuillu sumiiffimmi angalanissaat inassutigineqanngimmat erseqqissassallugu pingaaruteqarpoq.

Annertunerusumik paasisaqarusunnermi attaveqarfissat:

Qaasuitsup Kommunia:

Sivso Dorph telefon 54 02 06, e-mail: sido@qaasuitsup.gl

Hans Peter Lennert telefon 54 28 18, email: hple@qaasuitsup.gl