2017-imi Kulturimut aningaasaliissutaannik agguaassinerit aappaat

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq, Doris J. Jensen, maaji 2017-imi qinnuteqaateqartitsinermut atatillugu suliniutinut assigiinngitsunut 22-nut, tapiissutinik katillugit 1.457.066 kr.-nik agguaassivoq. Aningaasat agguaanneqartut aningaasaliiffinnit pingasuniit ataani pineqartunit agguaanneqarput.

Kultureqarnermut aningaasat
Kultureqarnermut aningaasanit suliniutinut assigiinngitsunut arfinilinnut tapiissutinik 369.564 kr.-nik tunniussisoqarpoq, taakkunannga ilaatigut eqqumiitsulianik saqqummersitsinerit, isiginnaartitsinerit assigisaallu matussusiivigineqarput. 100.000 kr.-t Nuuk Nordisk Kulturfestivalimut oktoberimi pisussamut tunniunneqarput. Aningaasat inunnit ataasiakkaanit, kattuffinnit il.il. suliaminnut suliniutiminnullu atatillugu qinnutigineqarsinnaapput, pingaartumillu aningaasarsiutigalugu eqqumiitsuliortut ingerlataannut suliniutaannullu suliniutinullu allanut eqqumiitsuliornikkut qaffasissusilimmik suliaasunut aningaasat tunniunneqarnerusarput.

Filmiliornermik ingerlataqartunut aningaasat
Filmiliornermik ingerlataqartunut aningaasanit filmiliornermik pilersaarutinut arfineq pingasunut, tapiissutinik katillugit 629.502 kr-nik tunniussisoqarpoq. Filmiliornermik ingerlataqartunut aningaasanit kalaallit filmiliornermik pilersaarutaannut tapiissutinik qinnuteqartoqarsinnaavoq, pingaartumik oqaluttualiornernut piviusulersaarusiornernullu.

Atuakkat kalaallisoortut
Kalaallisut atuakkianik saqqummersitsisussanut tallimanut, aningaasanik katillugit 238.000 kr.-nik agguaassisoqarpoq.

Kulturimik sulialinnut aningaasaliissutit
Taakkua saniasigut kulturimik sulialinnut ataasiakkaanut qaammammut agguaanneqartartut 22.000 kr., eqqumiitsuliornikkut suliaqartunut sisamanut agguaanneqassapput.

Suliat aningaasaliiffigineqartut allattorsimaffiat www.naalakkersuisut.gl -imi aaneqarsinnaavoq.

Qinnuteqarnissap tullianut piffissaliussaq ulloq kingulleq tassaavoq 1. september 2017. Namminersorlutik Oqartussaniit Kulturimut aningaasaliissutit pillugit sukumiinerusumik paasissutissanik pissarsiniartoqarsinnaavoq nittartakkakkut www.sullissivik.gl -ikkut

Sukumiinerusumik paasisaqarnerorusukkaanni saaffigineqarsinnaavoq Naalakkersuisup allattaa Rosa Thorsen rosat@nanoq.gl +299 34 57 02