Nuugaatsiarmiut Illorsuarmiullu tikillugit oqaloqatigineqarput

Nuugaatsiami Illorsuarnilu innuttaasut Uummannamiittut ataasinngornermi juulip ulluisa pingajuanni Naalakkersuisunit aamma Qaasuitsup Kommuniaanersunit oqaloqatigineqarput.

Nuugaatsiarmiut aamma Illorsuarmiut oqaloqatigineqarneranni Naalakkersuisut siulittaasuat Kim Kielsen, Aalisarnermut Piniarnermullu Naalakkersuisoq Karl-Kristian Kruse, Qaasuitsup Kommuniani kommunalbestyrelsimi ilaasortaq – aamma 2018-imi ukiortaamiit Avannaata Kommuninngortussami ikaarsaarnermi ataatsimiititaliami siulittaasoq Palle Jerimiassen, tamarmik atorfilittanik peqateqarlutik, nunaqarfinni taakkunani marlunni innuttaasunik ataatsimeeqateqarput.

Juunip 17-anni tassaarsuaqarnerata kingorna Nuugaatsiami Illorsuarnilu innuttaasut nunaqarfimminnut utertariaqanngikkallarnerannik Upalungaarsimanissamut Ataatsimiititaliamiit innersuussutigineqartut sumik pissuteqarnersut sukumiisumik nassuiaasoqarpoq.

Nunaqarfinni taakkunani marlunni innuttaasut nunaqarfimminnut uteqqittussaajunnaartut siunissami sumi najugaqarnissartik pillugu namminneerlutik aalajangiinissaat pingaarnerpaajutinneqartoq Naalakkersuisuniit aamma kommunimiit oqariartuutigineqarpoq.

”Ilaatigut apeqqutigineqareerpoq nunaqarfigisasi nappaqqinneqassanngippata taava imaassanersoq maani Uummannami illunik sanaartortitsisoqassasoq, uanga akissutigaara matumani apeqqutaalluinnartoq ilissi eqqugaasusi sumiikkusunnerunersusi. Tamannalu aamma maani najornissinni ilissinnut toqqaannartumik oqaatigerusuppara. Ilissi oqartussaanerpaavusi ingerlariaqqinnissassinni sumi najugaqarusunnerunerlusi,” Naalakkersuisut siulittaasuaq Kim Kielsen oqarpoq.

Nuugaatsiami Illorsuarnilu innuttaasut najorlugit ulluni makkunani oqaloqatigineqarmata Naalakkersuisuniit aamma kommunalbestyrelsimiit nuannaarutigineqarpoq. Naalakkersuisut siulittaasuat Kim Kielsen ima oqarpoq:

”Suli suliassat amerlaqaat, kisianni nuannaarutigaara innuttaasunik naapitsinitsinni malunnarmat juunip 17-anni pisup kingorna innuttaasut alloriaqqinnissamut tunngasut pillugit isumaliutersornerat aallarteersimasoq, pigisaminnik erligisaminnik aallersinnaanissartik imminnullu pilersoqqilernissaminnut periarfissanut tunngasunik saqqummiussuiffigivaatigut.”

Innuttaasunik ataatsimiititsinerup tullia Aasianni ullumikkut pisussaavoq, tassani oqaloqatigineqassallutik Aasiannut qimarngukkallarneqarsimasut.

Annerusumik paasisaqarusuttut attavigisinnaasaavaat, Namminersorlutik Oqartussani tusagasiinermik suliaqartoq Frederik Lund 48 79 17-imut sianerfigalugu – taavalu aamma Qaasuitsup Kommuniani aqutsisoqarfimmi pisortaq Sivso Dorph 54 02 06-imut sianerfigineqarsinnaasoq.