Ajornartorsiornermi suleqatigiilluarneq ataqatigiissitsilerpoq

Arfininngornermi ulloq 17. juni 2017-imi Uummannap avannaatungaani ajunaarnersuaqarnera tunngavigalugu Naalakkersuisut aningaasaliinissaannut piginnaatitsissutit arlallit Inatsisartut Aningaasaqarnermut Akileraartarnermullu Ataatsimiititaliap tallimanngornermi ulloq 30. juni 2017-imi immikkut ittumik ataatsimiinnermini akuersissutigai.

Taamaaliornikkut tapersiissuteqarusuttut tunniussassaannik tigusinissamut atuinissamullu inatsisitigut tunngavissat qulakkeerneqarput. Tamatumani immikkut tunngavigineqartoq tassaavoq sapaatip akunnerisa marluk matuma siornagut ajunaarnersuaqarnerata kingorna nunani allani naalakkersuisunit arlalinnit suliniaqatigiiffinnillu ajunaarnersuarmut tapiissuteqarusullutik saaffiginnissutinik Naalakkersuisut tigusaqarsimanerat. Ilaatigut Islandimit, Savalimmiunit, Danmarkimit Nunavumilli saaffiginnittoqarpoq. Kingullermik kunngikkormiut aningaasaqarnikkut tapiissuteqarniarlutik aamma neriorsuuteqarput.

Piginnaatitsissutit nutaat malillugit ajunaarnersuaqarnera tunngavigalugu immikkut ikiorsiissuteqarnermi aningaasartuutaanerusut akilernissaannut tapersiissuteqartut akiliutaannik atuinissamut Naalakkersuisut aningaasaliissutitigut tunngavissaqalerput.

”Tapersiineruvoq innuttaasut tamaasa sinnerlugit Naalakkersuisunit qujarullugu tiguneqartoq”, taama oqarpoq Naalakkersuisoq Aqqaluaq B. Egede.

Ajunaarnersuaqartoqarnerata kingorna annertuumik suliniuteqartut tamaasa Naalakkersuisup assorsuaq qujaffigerusuppai, tassaasut nammineq piumassutsiminnik suliniuteqartut, politiit, sakkutuut, kommunit Namminersorlutillu Oqartussat allaffeqarfiat. Aammattaaq innuttaasut suliffeqarfiillu kiisalu suliniaqatigiiffiit, soorlu NunaFonden aamma Kalaallit Røde Korsiat annertoorujussuarmik piumassuseqarlutillu suliniuteqarsimapput eqqorneqartut ulluinnaat aallartinneranni sapinngisamik piaarnerpaamik tapiissuteqarniarlutillu ikiuunniarnermikkut.

Naalakkersuisoq Aqqaluaq B. Egede oqarpoq: ”Innuttaasut ikiuukkumatunerat assorsuaq maluginiarparput, tamatumalu takutippaa ajunaarnersuaqartillugu inuiaqatigiittut ikioqatigiissinnaasugut. Taama ataqatigiissinnaaneq piffissami aggersumi ulluinnarni unammilligassaqaleqqippat aamma eqqaamassavarput.”

Sapaatip akunnerini marlunni kingullerni suliat annertoorujussuit pisinnaasimapput suleqataasut tamarmik akornanni suleqatigiilluartoqarneratigut. Ajornartorsiorneq tassanngaannaq pisoq maanna ataatsimut isigalugu qaangiussimalerpoq, taamaattorli innuttaasut eqqugaasut inuuniarnermikkut pitsaanerpaamik atugassaqarnissaat qulakkeerniarlugu siunissami suli annertuumik suliassaqassaaq.

Inussiarnersumik inuulluaqqusillunga

Aqqaluaq B. Egede
Aningaasaqarnermut Akileraartarnermullu Naalakkersuisoq

2017-imi aningaasanut inatsimmi oqaasertaliussat allanngortinnerisigut piginnaatitsissutit Aningaasaqarnermut Akileraartarnermullu Ataatsimiititaliamit akuerineqartut ilanngussatut ilanngunneqarput.
Aningaasaqarnermut Akileraartarnermullu Ataatsimiititaliap aalajangigaa Inatsisartut nittartagaanni www.ina.gl tamanut saqqummiunneqassaaq.