Suleqataasunut tamanut qujanarujussuaq

Allattoq: Kim Kielsen, Naalakkersuisut siulittaasuat

Politiit aalajangerput Uummannap sulluani arfininngornerup siuliani unnukkut qaqqami innap annertuup sisoornerata malitsigisaanik tassaarsuaqarnerani Nuugaatsiami inunnik sisamanik tammaaneqartunik ujaasinertik unitsinniarlugu. Tammaaneqartut taakku ajunaarsimanissaat naatsorsuutigineqarpoq.

Taamaattumik ilaqutaasunut, ikinngutaasunut ilisarisimannittunullu tamanut qamannga pisumik misiginneqataanera matumuuna oqaatigerusuppara. 

Nuannaarutigaara Naalakkersuisoq Erik Jensen peqatigalugu Naalakkersuisut sinnerlugit Uummannamiinnitsinni taavani innuttaasut nunaqarfinnilu qimarngussiviusuni najugaqartut aamma Uummannap eqqaani nunaqarfinni allani tassaarsuarmit toqqaannartumik eqqugaanngitsuni innuttaasut naapissinnaasimagakkit. Nammineerluta malugisinnaavarput taavani sumiiffinni tamani innuttaasut qanoq attortisimatiginersut, soorunami ingammik Nuugaatsiami nunaqarfinnilu qimarngussiviusuni innuttaasut akornanni.

Taamaammat pinngortitap piliaanik ajunaarnersuup kingunerisaanik eqqugaasunut ikiuiniarlutik immikkut ittumik sullissilluarsimasorpassuit tamaasa nersorusuppakka. Politiini illersornissaqarfimmilu sulisut unnuaqaratik ikiuiniarnermi ataqatigiissaarilluarnerat arajutsisimaneqanngilaq. Politiit sakkutuullu taamatut annertuumik sullissinertik ataqqineqaatissaraat, ajunaarnersuullu peqqammerneraniilli annertuumik sulisimanerat pillugit assut qutsavissaraagut.

Aamma politiit sakkutuullu ajunaarnersuup peqqammernerani aallartillutik sulerujussuareerlutik toqqaannartumik isumaginnittuujunnaalerneranni nunaqarfinniit qimarngussuunneqarsimasut isumagineqarneranni kommunimiit iliuuserineqarsimasut assut Naalakkersuisuniit nersorusuppagut. Kommunimi upalungaarsimanermik suliaqartut Namminersorlutik Oqartussani upalungaarsimanermik suliaqartut suleqatigalugit ulluunera unnuaaneralu apeqqutaatinnagit sulisimaqaat, soorluttaaq aamma kommunimi sulisut allat innuttaasut qimarngussuunneqarsimasut ikiorniarlugit annertuumik sulilluarsimasut. Tamassinnut qujanarujussuaq. Iliuuserineqartut tamarmik eqqugaasunut qanoq pingaaruteqartiginerat maluginngitsoorneqarsinnaanngilaq.

Aamma nunatsinni, Danmarkimi nunanilu allani nammineq kajumissusertik tunngatigalugu ikiuiniaqatigiiffiit, suliffeqarfiit ilarpassuini, naalakkersuisoqarfinni, pisortat sullissiveqarfiini allanilu sulisorpassuit sumiluunniit ikiortissamik pisariaqartitsisunut ikiuussinnaanissartik siunertaralugu ulluinnarni suliarisartakkaminik tamanik tunulliussigallarlutik suleqataapput. Assersuutigiinnarlugu Nuugaatsiap eqqaani pinngortitap piliaanik ajunaarneq sumik aallaaveqarnersoq, aamma taamatut pisoqaqqissagaluarpat qanoq sillimmartaarniartoqarsinnaanersoq pillugit ilisimasariaqakkanik ujartuinermi nunani tamani inuit ilisimasaqarnerpaat attaveqarfigineqarnerat ullualuinnaat ingerlaneranni aaqqissuunneqarpoq. Inuit tamakku siunnersuuteqarnissaat naatsorsuutigissavarput.

Aamma Erik Jensenilu tikitatsinni tamani inuit akunnerminni ataqatigiilluarnerujussuat malunnartorujussuuvoq. Innuttaasut akunnerminni taama qanilaartumik ataqatigiilluartiginerat assut tulluussimaarutigaara. Ataqatigiinneq susassareqatigiinnerlu taanna Uummannap eqqaani innuttaasut – toqqaannartumik eqqugaasimanersut apeqqutaatinnagu – tamarmik toqqissimallutik inooqqilernissaannut toqqammavissat pingaarnerpaartarisussavaat.

Uummannap eqqaani innuttaasut qularutigissanngilaat siunissami pisussanut iliuuserineqartussanullu tunngatillugu inuiaqatigiit tamakkerlutik ikorfartueqataanissaminnut piareersimassammata. Tamanna ajutoorneq pisimatsiaannartorli malugereerparput, tamatumami kinguninngua namminneq piumassusertik aallaavigalugu ikiortissanik pisariaqartitsiffiusuni ikiuunnissaminnik neqeroorlutik saaffiginnissutit takkussuutipallammata. Matumuuna aamma Naalakkersuisut sinnerlugit taakkununnga qujavunga. Qujanaq ikiuukkusunnermik takutitsigassi aamma eqqugaasunut iluaqutissamik iliuuseqarusunnissinnut qujanaq.