Uummannap sulluani tassaarsuaqarnerata kingorna nunaqarfinni eqqugaasuni innuttaasut saqqummiivigineqarput

Naalakkersuisut aamma Qaasuitsup Kommuniata ataatsimooorlutik tusagassiorfinnut nalunaarutaat

Naalakkersuisut aamma Qaasuitsup Kommuniani kommunalbestyrelsi ataatsimoorlutik aalajangerput juunip ulluisa 17-anni Uummannap Sulluani tassaarsuaqarnerata kingorna Illorsuarni Nuugaatsiamilu innuttaasut nunaqarfimminnit qimarngussuunneqarsimasut ilisimatitsissuteqarfigineqarnissaat siunertaralugu ataatsimiinnissamut aggersarniarlugit. Paasissutissiilluni ataatsimiititsinerit Uummannami Aasiannilu ataatsikkut ingerlanneqarput, tallimanngornermi juunip 30-anni nal. qulinut.

Nunaqarfinni taakkunani marlunni innuttaasut, suli nunaqarfimminnit qimarngusimatinneqartut, tassaarsuaqarnerata kingorna Naalakkersuisut aamma kommunalbestyrelsip ataatsimoorlutik qanoq oqariartuuteqarniarnerannik ilisimatinneqarput. Oqariartuutigineqartut Kalaallit Nunaanni Upalungaarsimanermut Ataatsimiititaliap naliliineranik toqqammaveqarput.

Nuugaatsiamut tunngatillugu upalungaarsimanissamut tunngatillugu ilaatigut imatut allassimasoqarpoq:

Kalaallit Nunaanni Upalungaarsimanissamut Ataatsimiititaliap upalungaarsimanermik naliliinermini oqaatigaa, Nuugaatsiami maanna atugassarititaasut tunngavigalugit suli ulorianartorsiorfiusutut isigineqartariaqartoq. Tamatuma kingunerisaanik Kalaallit Nunaanni Upalungaarsimanermut Ataatsimiititaliaq naliliiivoq, maanna tunngaviusut tunngavigalugit innuttaasut Nuugaatsiamut utertariaqanngikkallartut.

Alapernaarsuinermut kalerrisaarinermullu atortunik pitsaasunik atulersitsisoqaraluarpalluunniit, naliliineq taanna allanngortinneqassanngilaq, pingaartumik piffissamut kalerrisaariffissamut mallillu portussusissaannut paasissutissat eqqarsaatigalugit.” 

Illorsuarnut tunngatillugu ilaatigut upalungaarsimanermut naliliinermi imatut allassimasoqarpoq:

Kalaallit Nunaanni Upalungaarsimanissamut Ataatsimiititaliap upalungaarsimanermik naliliinermini oqaatigaa, Illorsuit maanna atugassarititaasut tunngavigalugit suli ulorianartorsiorfiusutut isigineqartariaqartoq. Tamatuma kingunerisaanik Kalaallit Nunaanni Upalungaarsimanermut Ataatsimiititaliaq naliliivoq, maanna tunngaviusut tunngavigalugit innuttaasut Illorsuarnut utertariaqanngikkallartut.”

Tamatuma peqatigisaanik Kalaallit Nunaanni Upalungaarsimanermut Ataatsimiititaliaq naliliivoq, Illorsuit (nunaqarfiup ilaa) kingusinnerusukkut ulorianartorsiorunnaartutut naliliiffigineqassappat pisariaqassasoq:

- Sumiiffinni tunngavissiaq 2-mi tassaarsuarmik nutaamik eqqorneqarsinnaasutut naliliiffigineqartumi najugaqarfinnik, atuarfinnik inuiaqatigiinnilu ulorianartorsiornermi atortunik peqassanngitsoq.

- Alapernaarsuinermi kalerrisaarinermilu atortunik pitsaasunik ingerlatsinermilu isumannaatsunik atuutsitsisoqalissasoq. Maannarpiaq alapernaarsuinermi kalerrisaarinermilu atortunik, Kalaallit Nunaanni pissutsinut naleqquttunik misilinneqarsimasunillu ilisimasaqartoqanngilaq. Tamatumunnga atatillugu aamma qaqqap sisoorneranit tassaarsuup Illorsuit sineriaanut apuunnissaanut minutsit 12-iinnaanerat immikkut eqqumaffigineqartariaqarpoq.

- Nunaqarfik imartami sumiiffinni angalanissamut inassuteqarfiunngitsumi sumiissusersiornermi mianersoqqussuteqartarfiusumi inissisimanngilaq.

Upalungaarsimanissamut Ataatsimiititaliap naliliinera tunngavigalugit Naalakkersuisut aamma kommunalbestyrelsi aalajangerput naliliinerit taakku tusaatissatut tiguniarlugit, taamaalillutillu kommunalbestyrelsip Naalakkersuisullu ullumikkut ilisimaneqartut tunngavigalugit Nuugaatsiami Illorsuarnilu innuttaasut nunaqarfimminnut utertariaqannginnerannik naliliinerit isumaqataaffigaat.

Qaasuitsup Kommuniani kommunalbestyrelsip Naalakkersuisullu  nunatsinni nunaqarfiit inuussutissarsiornikkut siuariartorfiusut najugaqarfiujunnaarnissaat kissaatiginngilluinnarpaat, sillimaniarnerli sunit tamanit pingaarnerpaatinneqartariaqartoq matumani nassuerutigineqarpoq.

Tamanna tunngavigalugu Naalakkersuisut aamma kommunalbestyrelsip pingaartippaat:

- innuttaasut pineqartut siullersaallutik toqqaannartumik ilisimatinneqassasut. Ilanngullugit ilisimatitsissutigineqassasut suli qaqqap innaanik sisooqqittoqarsinnaaneranut malitsigisaanillu tassaarsuaqaqqissinnaaneranut aarleqqutissaqartoq,

- inuit allat inuunerinik annaasaqaqqinnginnissap pingaaruteqarneranik paasinnititsinissaq.

- innuttaasut eqqorneqartut toqqissisimatilernissaat, tassungalu ilanngullugu eqqugaasut sapinngisamik piaartumik ulluinnarni nalinginnaasumik toqqissisimasumillu inuuleqqinnissaat anguniarlugu Naalakkersuisut Kommunalbestyrelsilu eqqugaasunut ikiuunnissamut piareersimanerisa nalunaarutigineqarnissaa.

Qaasuitsup Kommuniata sapinngisamik piaarnerpaamik nunaqarfinni taakkunani innuttaasut eqqartueqatigisalissavai.

Qaasuitsup Kommuniani kommunalbestyrelsip aamma Naalakkersuisut pingaartilluinnarpaat nunaqarfinni taakkunani innuttaasut paasissutissinneqartarnermikkut eqqarteqatigiittarnernilu naligiissumik inissisimatinneqassasut

Nunaqarfinni taakkunani innuttaasut piffissami aggersumi iliuuserineqartartussanut isumaliutigineqartartussanullu tunngatillugu toqqaannartumik peqataatinneqassapput. Taamaattumik innuttaasut pineqartut peqatigalugit taakkununnga attuumassuteqartunik ataatsimiitsitsisoqartassaaq.

Matumani ataatsimoortumik oqariartuutigineqartunut tunngatillugu paasissutissanik sukumiinerusunik pisariaqartitsisut attaveqarfigisinnaasaat tassaapput:

Namminersorlutik Oqartussaniit:

Pinngortitamut Avatangiisinullu Naalakkersuisoqarfimmi pisortaq Mette Skarregaard Pedersen: oqarasuaat 34 51 22 imaluunniit e-mailikkut: mesp@nanoq.gl

Naalakkersuisut siulittaasuat Kim Kielsen attaveqarfiginiaraanni attavissaq: Naalakkersuisumut allatsi Karen A. Motzfeldt oqarasuaat 56 24 50 imaluunniit e-mailikkut: karm@nanoq.gl

Qaasuitsup Kommuniani attavigineqarsinnaasut:

Ingerlatsivimmi pisortaq Sivso Dorph oqarasuaat 54 02 06 imaluunniit e-mailikkut: sido@qaasuitsup.gl

Aamma Qaasuitsup Kommuniani borgmesteri Ole Dorph oqarasuaat: 54 69 10

Palle Jerimiassen Ikaarsaariarnermi ataatsimiititaliami siulittaasoq 56 59 81