Inatsisitigut ataataqanngitsuunerup inummut sunniutai pillugit qulaajaanerup tamanut saqqummiunneqarnera

Meeqqat inatsisitigut inissisimanerat pillugu Kalaallit Nunaannut inatsisip allanngortinneqarnissaa pillugu inatsisissatut siunnersuummut kiisalu kingornussisarneq pillugu Kalaallit Nunaannut inatsisissatut siunnersuummut Folketingip isumaliutissiissutaa tunuliaqutaralugu inatsisitigut ataataqanngitsuunerup inummut sunniutai pillugit qulaajaaneq suliarineqarpoq

Qulaajaaneq danskit Meeqqanut Isumaginninnermullu ministeeriaqarfiat sinnerlugu Jacob Lindholmimit Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoqarfik suleqatigalugu suliarineqarpoq.

Inatsisitigut ataataqanngitsunik kiisalu ilinniarsimasunik attuumassuteqartunik apersuinerit qulaajaanermut ilaatigut tunngavigineqarput. Inatsisitigut ataataqanngitsut pillugit suleriaqqinnissamut qulaajaaneq kaammattuutinik imaqarpoq. Suliniutitut siunnersuutigineqartut pillugit suleriaqqinnissamut Isumaginninnermut, Ilaqutariinnermut, Naligiissitaanermut Inatsisinillu Atuutitsinermut Naalakkersuisoqarfik Meeqqanut Isumaginninnermullu Ministereqarfimmik oqaloqateqarpoq. Suliniutinik malitseqartitsineq tamatuminngalu suleriaqqinnissaq siusinnerpaamik 2017-imi ukiakkut piareersinnaajumaartoq naatsorsuutigineqarpoq

Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoq, Sara Olsvig, qulaajaanerup tamanut saqqummiunneqarneranut atatillugu ima oqaaseqarpoq: ”Maannamut taamatut angusaqartiginerput nuannersuuvoq. Inatsisitigut ataataqanngitsut pillugit suliniutit suliaralugit ingerlateqqinnissaannut qulaajaaneq sakkugissallugu pingaaruteqarpoq. Maanna uannut pingaaruteqarpoq, qulaajaanermit suliniutissatut siunnersuutigineqartunut malitseqartitsinissaq pillugu atorfilittama Meeqqanut Isumaginninnermullu ministereqarfimmik kingunissalimmik oqaloqatiginninnissaat.”

Qulaajaaneq uani takuneqarsinnaavoq taamatullu Meeqqanut Isumaginninnermullu ministeeriaqarfiup nittartagaani takuneqarsinnaavoq.

Suli allanik apeqqutissaqartoqarpat ministerimut allatsi Nina Jul Larsen attavigineqassaaq, Oqarasuaat angallattagaq: +299 53 93 71, mail: nina@nanoq.gl