Juunip ulluisa 17-ianni Uummannami eqqaanilu tassaarsuaqarnerata kingorna pissutsit

Juunip ulluisa 17-ianni tassaarsuaqarnerata kingorna Kalaallit Nunaanni Upalungaarsimanermut Ataatsimiititaliaq erngerluni aggersarneqarpoq, tamatumalu kingorna ataatsimiititaliaq aqqaneq marloriarluni ataatsimiippoq. Ajornartoornerup aallartinnerani ataatsimiinnerit nalunaaquttap akunnialuinik akunneqartinneqartarput, kikkut tamarmik pilertortumik iliuuseqartarnissaasa, suleqatigiinnissaasa ajornartoornerullu ineriartornera pillugu paasisaqarluartarnissaasa qulakkeerneqarnissaa pingaaruteqarmat. Kalaallit Nunaanni Upalungaarsimanermut Ataatsimiititaliami ilaasortat tamatigut ataatsimiititaliamut pilertortumik takkunnissamut piareersimasartussaapput. Kalaallit Nunaanni Upalungaarsimanermut Ataatsimiititaliami ilaasortat Namminersorlutik Oqartussanut ornigullutik naapittarput.

Kalaallit Nunaanni Upalungaarsimanermut Ataatsimiititaliaq kalaallit sullissisut aamma naalagaaffimmi oqartussaasut suliaqarfii akimorlugit ajornartoornermik pingaarnertut aqutsinissamut akisussaasuuvoq.

”Uanga Upalungaarsimanermut Ataatsimiititaliamut siulittaasutut oqartussaasut akimorlugit suliniuteqarneq nersorluinnarpara. Ajornartoornermi unatut ittumi Upalungaarsimanermut Ataatsimiititaliami ulloq unnuarlu sulisoqarpoq. Aaqqiissutissanik pitsaanerpaanik qulakkeerinissaq, aammalu pisuni siulliuniarnissaq aallunneqartuarpoq”, Upalungaarsimanermut Ataatsimiititaliap siulittaasua Mette Skarregaard oqarpoq.

Immikkut ilisimasallit naliliinerat malillugu pingaartumik juunip ulluisa 17-ianni sisoorfiusup kitaani, 1 km-inik ungasissusilimmi, aammalu qajannarunnaarfiusinnaasunit allanit qaqqap sisoorluni tassaarsuarmik pilersitsisinnaanissaanik suli ulorianartorsiortoqarpoq. Taamaattumik Upalungaarsimanermut Ataatsimiititaliaq siunissami upalungaarsimanissaq eqqarsaatigalugu Nuugaatsiami aamma Illorsuarni isumannaassusissaq pillugu naliliinermik suliaqarpoq. Upalungaarsimaneq eqqarsaatigalugu inuit inuunerannik annaasaqaqqinnissamut ulorianartorsiunnginnissaq pingaarnerpaavoq.

”Tamatuma peqatigisaanik Uummannami eqqaanilu najugaqartut eqqarsaatigalugit nuannaarutigaara, Uummannami sumiiffimmiluunniit nunaqarfinni allani ulorianartorsiortoqavinngitsoq Upalungaarsimanermut Ataatsimiititaliamit naliliiffigineqarmat”, Mette Skarregaard nangippoq.

Upalungaarsimanermut Ataatsimiititaliaq Nuugaatsiap Illorsuillu siunissaannut aalajangiisussaanngilaq, taamaallaalli upalungaarsimanermut naliliinermik, Naalakkersuisunut ingerlateqqinneqartussamik saqqummiussissaaq.

Annertunerusumik paasisaqarusunnermi Naalakkersuisoqarfimmi Pisortaq Mette Skarregaard Pedersen (tlf. 34 51 22, e-mail mesp@nanoq.gl) attaveqarfigineqassaaq imal. Avatangiisinut Upalungaarsimanermullu immikkoortortaqarfimmi pisortaagallartoq Per Ravn Hermansen (tlf. 34 67 11, e-mail per@nanoq.gl).