Nunatat ujarassiornikkut pilerinaatillit annikitsumik aatsitassarsiornermik akuersissutaatilinnut inniminnerneqartut

Annikitsumik aatsitassarsiornermik ingerlatsinermi pitsaasumik ineriartornerup ikorfartornissaa Naalakkersuisut kissaatigaat. Taamaammat nunatat NunaMineralsip akuersissuteqarfigisaasa ilaasa annikitsumik aatsitassarsiornermik ingerlatsisunut inniminnerneqarnissaat Naalakkersuisut aalajangiuppaat. Tamatumalu nassatarisaanik piffik akuersissuteqarfiusimasoq marlunnut avillugu taamaallaat annikitsumik aatsitassarsiornermik ingerlatsisunut qinnuteqarfigineqartussatut ammatinneqassaaq.

Piffiit marluk taakku annikitsumik aatsitassarsiornermik ingerlatsisunut inniminnerneqartut tamarmik 10 km2 -erisut annertussuseqarput, kujataanilu Uunartup Kangerluata eqqaaniillutik. Piffiit ujarassiornikkut soqutiginartutut nalilerneqarput, tamaanilu annikitsumik aatsitassarsiornermik ingerlatsiumasut soqutiginartunik nassaarnissamut periarfissagissaarput. Piffinni taakkunani kuultimik nassaarnissaq immikkut ilimanaateqarpoq, taakkulu tikikkuminassusaat annertussusaallu annikitsumik aatsitassarsiornermik ingerlatsisunut soqutiginaateqarsinnaavoq.

Aatsitassanut Ikummatissanullu Naalakkersuisoq Múte Bourup Egede piffiit annikitsumik aatsitassarsiornermik ingerlatsisunut inniminnerneqarnerannut atatillugu ima oqaaseqarpoq:

Annikitsumik aatsitassarsiornermik ingerlatsinermik soqutiginninnerup annertusiartornera nuannaarutigaara. Taamatut pitsaasumik ineriartorneq peqataaffigerusuppara. Piffiit soqutiginaatillit annikitsumik aatsitassarsiornermik ingerlatsisunut inniminnerneqarnerat, tamatumunnga ikorfartuutitut suliniutit ilagaat. Peqatigisaanik annikitsumik aatsitassarsiornermik ingerlatsinermi ineriartornermi piffinni innuttaasut innimigalugit suleqatigalugillu pinissaat qulakkeerneqassaaq. Taamaammallu Naalakkersuisut Kommune Kujallermik oqaloqateqarnerminni kujataani ujarassiornikkut piffiit soqutiginaatillit marluk taakku, annikitsumik aatsitassarsiornermik ingerlatsisunut inniminnerneqarnissaat aalajangiuppaat.

Piffiup annikitsumik aatsitassarsiortunut inniminnerneqarnissaanik aalajangerneq, Naalakkersuisut piffissami matumani annikitsumik aatsitassarsiornermik ingerlatsisunut sammititanik suliniutaasa arlallit ilagaat. Kingullermik aatsitassarsiornermut inatsisip allanngortinneqarneratigut annikitsumik aatsitassarsiornermik ingerlatsisunut tunngasut eqaannerusunngortinneqarput. Malittarisassallumi aamma ersarinnerulerput, taamaalillutillu paasiuminarnerulerlutillu sulissutigiuminarnerulerlutik. Taamattaaq Aatsitassanut Ikummatissanullu Naalakkersuisoqarfik qanittumi annikitsumik aatsitassarsiornermik ingerlatsinermut tunngasunut paasissutissiissutinik saqqummiussivoq.

Erseqqinnerusumik paasisaqarumallutik ukununnga attaveqarit:
Jane Petersen Lantz
Naalakkersuisup allattaa – Aatsitassanut Ikummatissanullu Naalakkersuisoqarfik
tlf: 346800, e-mail: japl@nanoq.gl
Rannvá Clementsen
Immikkoortumi pisortaagallaartoq – Aatsitassanut Ikummatissanullu Aqutsisoqarfik
tlf: 346808, e-mail: racl@nanoq.gl