Ikiuussimasut tamaasa qutsavigai

Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoqarfik Nuugaatsiami pisunut ajornartoornermi upalungaarsimatitanut peqataavoq, ikiuussimasullu kikkut tamaasa qutsavigalugit

Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoqarfik, Isumaginninnermut Aqutsisoqarfik aqqutigalugu 17. juni 2017-imi ajunaarnersuaqarmalli Nuugaatsiami pisunut upalungaarsimatitanut suleqataalluinnarpoq, pissutsillu sukumiisumik suli malinnaaffigalugit.

Sapaatip akunnerata naanerani ajunaarnersuaqartoqariartorli, Isumaginninnermut Aqutsisoqarfiup kommunimi upalungaarsimasuutitat tapersersorniarlugit tarnip pissusaanik ilinniarsimasut tarnikkullu katsorsaasartut Uummannamut aallartippai. Tamatuma saniatigut ajunaarnersuaqarneranit ulluni tulliuttuni Isumaginninnermut Aqutsisoqarfik isumaginninnermut siunnersortinik ikiuiartortitanik aallartitaqarput.

Eqqugaasunut, nalaassimasamik atugarileriataakkamillu artornartup iliuuseqarfiginissaannut ikiorneqarnissamik pisariaqartitsisunut meeqqanut inersimasunullu ajornartoornermi ikiuussimapput. Nuugaatsiamilu ikiligaasunut, Nuummi Dronning Ingridip Napparsimmavissuanut qimarngutinneqarlutik timmisartuunneqartunut Isumaginninnermut Aqutsisoqarfik ajornartoornermi ikiuuttussanik peqatigisaanik atugassiivoq. Kalluagaasut Uummannamiittut Nuummiittullu ikiorneqarnissamik pisariaqartitsisut tamarmik ajornartoornermi suli ikiorneqarsinnaapput.

Suliniuteqarnermi Qaasuitsup Kommunia pisup ingerlanera tamakkerlugu qanimut suleqatigineqarpoq, najukkamilu ajornartoornermi upalungaarsimasunik aqutsinermut atatillugu Isumaginninnermut Aqutsisoqarfiup kommuni siunnersorlugulu tapersersortarpaa. Tamatumunnga atatillugu Isumaginninnermut Aqutsisoqarfik najukkami upalungaarsimasunut oqaloqateqarluni oqilisaassisarpoq siunnersuisarlunilu, pissutsillu qanoq ineriartornerat pillugu kommuni ataavartumik oqaloqatigineqartarluni. Taamaasilluni innuttaasunut eqqugaasunut ikorfartuisumik allatigut qanoq ikiuisoqassanersoq kommunip Isumaginninnermullu Aqutsisoqarfiup ataatsimoorlutik suli nalilersorlugu ingerlatissavaat.

Ajornartoornermi upalungaarsimasuutitat Nuugaatsiami ajunaarnersuarmut atatillugu kusanarluinnartumik suliamillu ilisimasaqarluarluni aqunneqarnerat Isumaginninnermut, Naligiissitaanermut Inatsisinillu Atuutsitsinermut Naalakkersuisup Sara Olsvigip angusatut ajunngitsutut isigaa:

Ajunaarnersuarmi alianaqisumi pinngortitami ajunaarnersuarmit eqqugaasunik sapinngisamik pitsaanerpaamik ikiuiniarluni inuit taama amerlatigisut ingerlaannaq sassarnerat takullugu tupinnarluinnarpoq. Piffissami aggersumi suli suliassaqaqaagut. Ajornartoornermi ikiuisimasut, peqataasimasut allatigulluunniit pisumi artornartumi matumani ikiuuteqataasimasut tamaasa annertuumik qutsavigerusuppakka.”

Paasissutissanik annertunerusunik piniaruit attaveqarfigiuk: Naalakkersuisup allattaa Nina Jul Larsen, Mobil +299 53 93 71, mail: nina@nanoq.gl