Uummannami eqqaanilu pissutsit

Kalaallit Nunaanni Politiit tallimanngormat nalunaarput, Niaqornani, Saattuni, Ukkusissani, Ikerasanni, Qaarsuni Uummannamilu innuttaasut ulorianartorsiorunnaartut. Tamatumunnga ilaatigut Asiaq-p, GEUS-ip nunanilu tamalaani suleqatit naatsorsugaat takussutissiaallu tunngavigineqarput.

Kangerlummi tassaarsuaqarneranik kinguneqartumik qaqqamik sisoortoqarnissaa suli ulorianartorsiortitsivoq, arfininngornermi juunip ulluisa 17-ianni qaqqami sisoorfiusup kimmut 1 km-ip missaanik ungasissusilimmi sumiiffimmik qajannaakkunnaarsimasumik allamik malussartoqarmat.

Tassalu taamatut tassaarsuartoqarnissaa Niaqornani, Saattuni, Ukkusissani, Ikerasanni, Qaarsuni Uummannamilu innuttaasunut ulorianartorsiortitsisussaanngitsoq naliliisoqarpoq. Tamatumani juunip ulluisa 17-ianni takusat kiisalu sumiiffimmit ulorianartorsiorfiusumit tassaarsuartoqarnissaanut immikkut ilisimasallit najoqqutassianut takussutissiaat assigiinngitsut tunngavigineqarput.

Najoqqutassiani taakkunani takutinneqarpoq, mallit portusinerat Niaqornanut, Saattunut, Ukkusissanut, Ikerasammut, Qaarsunut aamma Uummannamut anngunnerminni annikillingaatsiarsimassasut.

Taamaalilluni Niaqornat inuerutsinneqarnerat atorunnaarsinneqarpoq. Kommuni aamma Namminersorlutik Oqartussat Niaqornani innuttaasut atorfillillu nunaqarfimmut uteqqissinnaanissaannut aaqqiissutissamik suliaqarput. Tamanna innuttaasunut, sullissivinnut suliffeqarfinnullu eqqugaasunut toqqaannartumik nalunaarutigineqassaaq.

Kisiannili qaqqaq sisooqqissagaluarpat Illorsuarni Nuugaatsiamilu innuttaasut sapinngisamik isumannaatsuunissaat eqqarsaatigalugu nunaqarfinnik inuerutsitsineq ingerlatiinnarneqassaaq.

Namminersorlutik Oqartussat nunap iluani nunanilu tamalaani immikkut ilisimasallit suleqatigalugit sumiiffimmi ulorianartorsiornermik nalilersuillutik suli annertuumik suliaqarput. Innuttaasunut eqqorneqartunut aaqqiissutissamik isumannaatsumik piaartumik nassaarnissaq anguniarneqarpoq. Allanik oqaluttuassaqartoqalerpat erngerluni tamanna nalunaarutigineqassaaq.

Annertunerusumik paasisaqarusunnermi attaveqarfissat:
Naalakkersuisoqarfimmi pisortaq, Pinngortitamut Avatangiisinullu Naalakkersuisoqarfik, Mette Skarregaard Pedersen, tlf. +299 52 98 44, e-mail mesp@nanoq.gl
Pisortap tullia GEUS, Flemming Getreuer Christiansen, tlf: +45 20 10 83 90, e-mail fgc@geus.dk