Dorisip kalaallit timersortartut tapersersorpai

 

Timersortartut nunatsinni tamaneersut 106-t Sverigip qeqertaani tusaamasaasumi Gotlandimiipput. Illoqarfimmi Visbymi 23.000-inik inulimmi unammisartut 3000-t nunarsuarmi qeqertani 23-ineersut ulluni arfinilinni tulliuttuni medaljannanniutissapput.


Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisup Doris Jakobsenip nuannaarutigaa kalaallit unammisartuisa qeqertamut tikilluaqqusaanerat.

Kalaallit timersortartuisa Visbymut tikilluaqqusaanerat nuannaarutigaara, Doris Jakobsen ullumi arfinngornermi Gotlandimut tikittoq oqarpoq.

Kalaallit Nunatta Island Gamesimik unammiuaarnerit suli ingerlatsisuuffiginikuunngilai. Doris Jakobsen isumaqarpoq siunissami nunatsinni aaqqissuunneqassappata siumut pilersaarusiorneq sukumiisoq ingerlanneqartariaqartoq.

-Siunissami aaqqissuussat taamaattut nunatsinni ingerlanneqartalissappata Island Gamesimik aqqissuinissamik piumasaqaatit naammassineqaqqaartariaqarput, soorlu Savalimmiormiut aaqqissuinissamik ukiuni kingullerni misiliisarsimagaluartut itigartinneqartarsimallutilli, piumasaqaatinik naammassinninngissimanerat tunngavigalugu.
-Nunarput siunnissami aaqqissuissaguni stadion kisimi naammanngilaq, silamili ingerlanneqartartut soorlu golfertarfik inerisartariaqarput, Doris Jakobsen oqarpoq.
Qeqertat unammisaqattaartarnerat ukiut marlukkaarlugit ingerlanneqartarpoq. Kingullermik 2015-imi nunarput medaljamik ataatsimik pinnappoq.
Gibraltar tulliani unammisaqattaarnernik aaqqissuisuussaq. Nunatsinniit timersuutit assigiinngitsut arfineq pingasut ukioq manna ilaaffigineqarput.
Annertunerusumik paasissutissat piniarneqarsinnaapput uunga: Naalakkersuisup allattaa Rosa Thorsen, +299553303