Immikkut ilisimasallit qaqqap nakkutigisamik qaartinneqarnissaa inassutiginngilaat

Pinngortitamut Avatangiisinullu Naalakkersuisoqarfiup GEUS (De Nationale Geologiske Undersøgelser for Danmark og Grønland) suleqatigalugu Uummannap Kangerluani qaqqaq sisoornermik nutaamik pilersitsiviusinnaasoq peerneqarsinnaanersoq misissuiffigaa. Tamatumunnga atatillugu nunani tamalaani, ilaatigut Norgemiit immikkut ilisimasallit suleqatigineqarput.

Inerniliineq malillugu qaartitsinikkut assigisaanilluunniit sisoortitsinissaq immikkut ilisimasallit tamarmiullutik assigiimmik inassutiginngilaat. Nunani tamalaani nakkutigisamik qaqqamik sisoortitsisarneq annikitsuinnarmik misilittagaqarfigineqarpoq. Qaartitsinermi ilisimaneqanngitsumik naatsorsuutiginngisamillu sumiiffiit sanngeereersut sunnerneqarsinnaapput imaluunniit sanngiiffinnik nutaanik pinngortitsisoqarsinnaalluni. Taamaalilluni qaqqat immikkoortut nutaat arlallit qajannaakkunnaarsinneqarsinnaapput, nakkutigisamik sisoortitsinerup kingorna ukiuni arlalinni nikikkiartorfiulersinnaallutik. Taamaalilluni qaartitsinermi qaqqap qajannaassusia pitsaanerulersinnagu maanna pissusiusut ajornerulersinneqarsinnaapput.

Pinngortitamut Avatangiisinullu Naalakkersuisoqarfiup nunap iluani nunanilu tamalaani immikkut ilisimasallit suleqatigalugit sumiiffimmi ulorianartorsiorneq naliliiffiginiarlugu suli ulapputigaa. Innuttaasunut eqqorneqartunut aaqqiissutissamik isumannaatsumik piaarnerpaamik nassaarnissaq anguniagaavoq. Misissuinerit taakku ulloq unnuarlu ingerlanneqarput, aammalu misissuinerit inernerinik amerlanerusunik pissarsisoqariarpat taakku erngerlutik nalunaarutigineqassapput.

Annertunerusumik paasisaqarusunnermi immikkoortortaqarfimmi pisortaq:
Naalakkersuisoqarfimmi Pisortaq Mette Skarregaard Pedersen, tlf.: 34 51 22, e-mail mesp@nanoq.gl.
GEUS-imut Tullersorti, Flemming Getreuer Christiansen, tlf: +45 20 10 83 90, email fgc@geus.dk