Uummannap Kangerluani qaqqamik misissuinerit pillugit paasissutissat nutaat

Pinngortitamut Avatangiisinullu Naalakkersuisoqarfik GEUS nunanilu tamalaaneersunit ilisimatusartut arlallit suleqatigalugit Uummannap Kangerluani qaqqamik sisoortoqaqqissinnaanera naliliiffiginiarlugu ulapittorujussuuvoq.

Qaqqamik sisoortoqaqqissinnaaneranik naliliineq pingaarnerpaatut salliutinneqarpoq. Ulorianartorsiornerit paasiniarlugit ilisimatusartut tunngavissanik assigiinngitsunik suliaqarput. Ilaatigut qaqqamik sisoortoqaqqissappat tamatuma sumiiffimmut sunniutigisinnaasai, tassaarsuaqassappat taassuma sumiiffimmi nunaqarfinnut anngunnissaata sivisussusissaa aammalu mallit sinerissamiit qanoq ungasitsigisumut anngutissanersut misissuiffigineqarput.

Maannamut misissukkat inerneri nunaqarfiit Nuugaatsiaq, Illorsuit aamma Niaqornat inuerutsinneqarnerinut allannguinissamut tunngavissiinngillat. Aamma misissuinerit nunaqarfinnik allanik inuerutsitsinissamut tunngavissiinngillat.

Annertoorsuarmik misissuinerit ulluni tulliuttuni ingerlatiinnarneqassapput. Paasissutissanik nutaanik takkuttoqarpat Pinngortitamut Avatangiisinullu Naalakkersuisoqarfik nalunaaruteqarumaarpoq. Qaqqamik misissuinerit pissutsinik qanoq iliorluni aaqqiisoqarsinnaaneranut paasinarsititseqataassapput, taamaalillunilu innuttaasut eqqorneqartut sapinngisamik piaartumik paasisaqarsinnaassapput ulluinnarnilu inuunerminni toqqissisimalersinnaassallutik.

Upalungaarsimasut, Issittumi Sakkutooqarfik Politiillu suli sumiiffimmi nakkutilliipput aammalu paasissutissanik ingerlaavartumik saqqummiussisarput, innuttaasullu taakkununnga malinnaaqqullugit qinnuigineqarput. Innuttaasut isumannaassusaat suli pingaarnertut salliutinneqarpoq

Annertunerusumik paasisaqarusunnermi immikkoortortaqarfimmi pisortaq Karen Anne Arleth tlf.: 34 54 65-imut, e-mail knar@nanoq.gl, attaveqarfigeqquneqarpoq.