Nunaqarfimmiut kalaaliminernik nassartitsipput

Naalakkersuisut siulittaasuat Kim Kielsen, Naalakkerusisoq Erik Jensen angalaqatitillu maanna Ikerasanniit Uummannamut aallalerput, taakkulu Ikerasanni innuttaasuniit kalaaliminernik Uummannamut qimagussorneqarsimasunut pajugutigineqartussanik nassartinneqarput.

Naalakkersuisut siulittaasuat Kim Kielsen, Naalakkerusisoq Erik Jensen aamma assigiinngitsunik suliaqarlutik atorfillit ullut unnuallu marluk ingerlaneranni Uummannap eqqaani nunaqarfiit tulleriaarlugit tikeraaqqattaarpaat. Naalakkersuisut siulittaasuata kikkut tamaasa inuiattut ullorsiorluarnissaannik kissaappai, sapaatillu akunnerata siuliata naanerani Uummannap eqqaani pisoqarnerani iliuuseqaqataasut tamaasa qutsavigalugit.

Nunaqarfinnut angalanermi siunertaq tassaavoq Nuugaatsiap eqqaani qaarsup sisoorneratigut Nuugaatsiami tassaarsuaqarnerata kingunerisaanik Illorsuarni Niaqornanilu najugaqartut ilanngullugit qimarngussuunneqarnerannut tunngasunik paasissutissiisoqarnissaa. Ilanngullugu paasissutissiisutigineqarpoq qaarsortamik sisooqqittoqassagaluarpat innuttaasut suut sillimaffiginiartariaqarneraat.

Marlunngornermi ualikkit angalqatigiit Saattunut tikipput. Tassani innuttaasut atuarfimmi paasissutissiiffigalugit nunaqarfiup atuarfiani ataatsimeeqqatigineqarput. Tassanissaaq innuttaasut attortisimanerat malunnarpoq.

Kim Kielsen-ip aamma Erik Jensen-ip marlunngornermi ullaakkut Uummannamiit nunaqarfinnut angalaarnissartik sioqqullugu nunaqarfinniit qumangunneqartut Uummannami timersortarfimmut ornippaat. Innuttaasut kissaatitut saqqummiuppaat kalaaliminernik sungiusimasaminnik nerisaqarsinnaatitaanissartik. Saattuni innuttaasut ikiuukkusussutsiminnik takutitsipput nunaqarfimminniit kalaaliminernik pajunnermikkut. Poorsuit pingasut kalaaliminernik imallit tikiunneqarput, taakkulu Uummannamut qimarngunneqarsimasunut tunniunneqartussaapput.

Marlunngornermi unnuttoq angalaqatigiit Saattunut tikipput. Tassanittaaq aamma nunaqarfiup atuarfiani paasissutissiilluni naapeqatigiittoqarpoq. Angalaqatigiit sakkutuut angallataata Ikerasaap tungaanut ingerlarnerani Vædderen-imi unnuereerlutik angalaqatigiit pingasunngornermi ullaakkut Ikerasannut tikipput. Tassanissaaq aamma nunaqarfinni allani pisut assigalugit innuttaasut naapisimaarneqassapput.

Nunaqarfinni pingasuni tikinneqartuni tamani innuttaasut amerlanaarlutik takkuttarput, tikilluaqqusilluartaqalutillu. Malunnarpoq nunaqarfinni pingasuni tamani innuttaasut, Kim Kielsen, Erik Jensen angalaqataasullu naapisimaareeraangamikkit ernumanerat annikilleriartartoq.

Naalakkersuisut siulittaasuata Kim Kielsen-ip saniatigut Naalakkersuisoq Erik Jensen, Politikommissær Karl Jørgen Lennert, nunaqarfimmi peqqissaasoq Tina Hinrup Kristiansen aamma isumaginninnermut siunnersorti Gerda Fleischer nunaqarfinnut angalaqataapput. Nunaqarfinnut angalanermi sakkutuut angallataat Vædderen aamma Ejnar Mikkelsen angallassisuupput.

Uummannap eqqaani angalanernit assilisat

Annerusumik paasisaqarusuttut attavissaat: Nauja Møller oqarasuaat 58 26 54