Kulturikkut Nersornaat Ville Siegstadimut Niels-Henrik Lyngemullu, kajumissaasiullu Josef Tarrak Petrussenimut

Ukioq manna Kulturikkut Nersornaat qimussertartumut Ville Siegstadimut tusagassiortumullu Niels-Henrik Lyngemut tunniunneqarpoq, rappertartumullu Josef Tarrak Petrussenimut Naalakkersuisut kajumissaatitut nersornaasiuttagaat tunniunneqarluni. Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisup Doris Jakobsenip Katuami nersornaatit taakku marluk Inuiattut Ullorsiorfimmi juunip 21-ani tunniuppai.

Ville Siegstad pillugu Doris Jakobsen ilaatigut oqarpoq:

- Qimussimik sukkaniuttarnerup iluani ataqqisaalluni ilisimaneqarluartuuvoq, Ilulissani Qeqertarsuullu Tunuani sukkaniuttarnernut amerlaqisunut 1975-imiilli peqataasarnikuulluni, kiisalu Avannaata Qimussersua 1989-imili aallartimmat peqataaffigisarlugu. Najukkami Qeqertarsuullu Tunuani sukkaniunnerni arlalippassuarni ajugaasarnikuuvoq. Aammattaaq Avannaata Qimussersuani – peqataaffiginera ataqqinaataasutut isigineqartumi – ajugaasarnikuulluni 1996-imi, 2004-mi aamma 2009-mi, arlaleriaqalunilu peqataasarluni. Immikkut ilisimaneqaatigai qimmini paarilluakkat kusanartullu.

Niels-Henrik Lynge pillugu Doris Jakobsen ilaatigut oqarpoq:

- 1954-imiit 1958-imut realskolimi ilinniartuuvoq, Frederiksberigimi ilinniarnertuunngorluni, Danmarks Journalisthøjskolimilu tusagassiortutut ilinniarluni. KNR-imi aaqqissuisuunikuuvoq, tassanilu avatangiisit pinngortitarlu pillugit aallakaatitassiat nuannarineqarluartartut kulturilu pillugu aallakaatitat allat suliarisarlugit. Nipaa tusagassiuutitigut, kulturimut tunngasutigut oqaatsitigullu pikkorinnermigut ilisarisimaneqarluarpoq. KNR-imi nunanit allanit tusagassiisartuuvoq pinngortitarlu pillugu suliaqarluni, aallakaatitassiamigullu pinngortitaq oqaluttuarisaanerlu pillugit paasissutissiisarsimalluni, taamatullu kulturi pillugu saqqummiussisarluni, tusarnaartunit isiginnaartunillu nuannarineqarluartartunik. Avatangiisit pinngortitarlu pillugit TV-kkut aallakaatitat alutorineqarlualerput, aallakaatinneqaleraangata ilaqutariit isiginnaaqatigiittarlutik.

Josef Tarrak Petrussen pillugu Doris Jakobsen ilaatigut oqarpoq:

- Nipilersornerup silarsuaanni saqqummeqqammivoq, aammalu nunatsinni nunanilu allani maluginiarneqarlualerluni, siorna uissuummisitsisumik, oqallitsitsilersumik tinnerseraasumillu saqqummersitsinermi kingorna. Nipilersorluni videoliaani erinarsuut ”Tupilak”, siorna saqqummersitaa, erinarsuutaavoq sakkortooq, tinnerseraasoq uissuumminartorlu. Taalliortoq pisartunut isertuanngitsumik inuiaqatigiinnut oqariartortarnera tamatsinnut eqeersaataavoq, tassa eqqumiitsuliortup oqaasinngortitsisinnaanermigut piginnaanera.

Naalakkersuisut Kulturikkut Nersornaat 1982-imi pilersippaat. Nersornaat 50.000 kr-nik aningaasartaqartoq inummut ataatsimut arlalinnulluunniit, peqatigiiffinnut kattuffinnulluunniit eqqumiitsuliornikkut kulturilerinikkulluunniit immikkut suliniuteqarsimasunut tunniunneqartarpoq. Nersornaat ukiut tamaasa Inuiattut Ullorsiornitsinni juunip 21-ani tunniunneqartarpoq. Naalakkersuisut kajumissaatitut nersornaasiuttagaat 10.000 kr-nik aningaasartaqartoq siorna pilersinneqarpoq. Taannalu inuusuttumut piginnaasalimmut Kulturikkut Nersornaasiisoqarnerani aamma tunniunneqartarpoq.

Pia Lynge (Departementet for Uddannelse, Kultur, Forskning og Kirke) Toqq/direkte 345706 PILY@nanoq.gl

Oqalugiaat uani atuarneqarsinnaavoq

Katuami assilisat