Uummannap Kangerluani qaqqamik misissuineq aallartilluaruttorpoq

Asseq Arktisk Kommando-miit

Pinngortitamut Avatangiisinullu Naalakkersuisoqarfiup GEUS ’De Nationale Geologiske Undersøgelser for Danmark og Grønland’ suleqatigalugu Uummannap Kangerluani qaqqamiit sisoortoqaqqissinnaanera nalilersuiffigaa. Tassunga ilanngullugu qaarsoq aarlerissutaasoq peerneqarsinnaanersoq misissuiffigineqassaaq. Ulloq unnuarlu sulisoqarpoq, aammalu Asiaq-mit, Norges Geologiske Institut-imit (NGI), USA-mit aamma Schweiz-imit immikkut ilisimasalinnik suleqataatitsisoqassaaq. Suliaq pisariusuuvoq, kisiannili suleqataasunit tamanit annertuumik suliniuteqartoqarpoq.


Inuppassuit maannarpiaq pisunit attortisimapput. Qaqqap misissuiffigineqarnera pissutsit qanoq iliorlugit aaqqinneqarsinnaanerinik, taamaalillunilu sumiiffinni eqqorneqartuni innuttaasut qanoq iliorluni piaartumik nalinginnaasumik toqqissisimanartumillu ulluinnarni inuuneqaleqqinnissaannik paasiniaanermut tapertaassaaq.

Arfininngormat unnukkut qaqqap sisoortup saniatigut aamma Uummannap Kangerluani qaqqamik sisooriaannarmik paasisaqartoqarpoq. Upalungaarsimasut, Issittumi Sakkutooqarfiup Politiillu sumiiffik alapernaarsorpaat, sumiiffinnilu eqqaaniittuni innuttaasunut paasissutissanik ingerlaavartumik nassiussisarlutik.

Annertunerusumik paasisaqarusunnermi immikkoortortaqarfimmi pisortaq Karen Anne Arleth, tlf.: 34 54 65, e-mail knar@nanoq.gl, attaveqarfigineqassaaq.