Pinngortitami ajunaarnersuarmi eqqugaasut tamaasa Naalakkersuisut misiginneqatigingaarpaat, ikiuiniarlutillu tamaviaarput

Nuugaatsiami Uummannallu sulluani pinngortitami ajunaarnersuaqarnera sakkortoqaaq. Naalakkersuisut pisoq pillugu attortisimanerat annertuvoq, Upalugaarsimaniarnermullu Ataatsimiititaliaq qanimut suleqatigalugit ikiuigasuarnermik ingerlatsillutik.

Maannakkoqqissaaq Nuugaatsiami eqqaanilu annertuumik ujaasinermik annaassiniarnermillu ingerlatsisoqarpoq. Naalakkersuisut pisut ilungersunartut qanimut malinnaaffigaat.

Ajunaarnersuarmik eqqugaasut tamaasa Naalakkersuisut siulittaasuannut tullersorti Sara Olvigip Naalakkersuisut sinnerlugit misiginneqatiginnissutini oqaatigaa, nalunaaqutarlu 10.30 immikkut tugassiuutinik katersortitsinermi ikiuiniarneq ingerlanneqassasoq oqaatigalugu:

”Inuppassuarnik eqquisumik taamatut annertutigisumik pinngortitami ajunaarnersuaqarnera atortisimassutigeqaara. Naalakkersuisut Siulittaasuat Naalagaaffimmi Ataatsimiinnermit angerlamut ingerlaarpoq, taamaammat Siulittaasoq Naalakkersuisullu sinnerlugit ajunaarnersuarmik eqqugaasut tamaasa misiginneqatigingaarpakka. Oqartussat sumiiffimmiiipput, nunaqarfimmiillu qimarngussuisoqarpoq. Innuttaasut qimarngussorneqartut pisumillu eqqugaasut naapinniarlugit Naalakkersuisut sinniisui piaarnerpaamik Uummannamukassapput. Ikiorsiinissatsinnut piareersimavugut”

Annaassiniarneq ingerlasoq pillugu Naalakkersuisut tatiginnittorujussuupput. Pisut pillugit Naalakkersuisut ingerlaavartumik ilisimatinneqartarput, oqartussallu assigiinngitsut maannakkut annertuumik suliaqartut Naalakkersuisut qutsavigaat. Pingaartumik Politiit, Arktisk Kommando, Kommunimi sillimaniartut, Air Greenland, Peqqinnissaqarfimmi sulisut, ajutoortoqarnerani psykologit ikiuisartut piumassutsiminnillu sulisut maannakkorpiaq ikiuiniartut. Minnerunngitsumillu Nuugaatsiami, Illorsuarni, Uummannami nunaqarfinnilu allani innuttaasut Naalakkersuisut qutsavigerusuppaat.

Psykologit tarnikkut katsorsaasartut Naalakkersuisut Uummannamukartippaat, taakkulu inuit ajorluinnartumik tassanngaannaq misigisaqartut ikiorsissavaat.

”Taamatut pisoqarnerani ataatsimoortariaqarpugut”, Sara Olsvig oqarpoq, ”Nuugaatsiami eqqaanilu innuttaasut tapersorniarlugit Naalakkersuisut pisinnaasarput tamaat iliuuseqassaagut. Sukkasuumik ataatsimullu annertuumik iliuuseqarneq pillugu Naalakkersuisut qujapput. Qularutigineqassanngilaq inuit eqqugaasut ikiorniarlugit tamaviaarluta iliuuseqassagatta.”

Annertunerusumik paasisaqarusukkussi Naalakkersuisoqarfiup pisortaa Julie Præst Wilche attavigineqarsinnaavoq mobil nr. 551190 mail: jprw@nanoq.gl