Tusagassiutinut nalunaarut Kim Kielsenimit

Naalakkersuisut inunnut– nammineq piumassutsiminnik imaluunniit oqartussaasutut - ikiuuttunut aamma Nuugaatsiami eqqaanilu qarsutsineqarnerata kingornatigut nalissaqanngitsumik ikiuuttunut qujassuteqarumapput.

Naalakkersuisut Nuugaatsiami qarsutsineqarnerata kingornatigut pissutsit malinnaavigeqqissaarpaat. Naalakkersuisut inuppassuit oqatussaasunit assigiinngitsuneersut taamatullu nammineq piumassutsiminnik ikiuuttut ippassaq unnukkulli tupinnaannartumik suliniuteqarsimasut qutsavigerusuppaat.

Maannakkorpiaq peqataasut nukinginnartunik annaassiniarnermut nukitik atortussaavaat tassa upalunaarsimanissamik suliassatik suliaralugit. Upalunaarsimanissamik suliassat qaangiuteriarpata malitseqartitsiniarluni suliassat sammineqalissapput.

Naalakkersuisut Siulittaasuat Kim Kielsen oqaaseqarpoq:

”Pissutsit ilungersunarluinnaartillugit qujamasoqaanga tulluusimaarlungalu oqartussaasut inuillu nammineq piumassutsiminnik ikiuuttut tupinnaannartumik suliniarsimanerannut. Taamatuttaarmi Nuugaatsiami innuttaasut takutippaat pissutsit ilungersunarsitillugit peqatigiittoqarsinnaasut ikioqatigiillunilu. Innuttaasut aammattaaq upalungaarsimanissamik suliaqartut nalunaarutigisartagaat tusarnaarluartarsimavaat. Tamatumuuna ikiuiniarneq assut ajornannginneruleroiq. Innuttaasut kajumissaassavakkat upalungaarsimanermik suliaqartut nalunaarutigisartagaat tusarnaarluartaqqullugit.

Naalakkersuisut paasitinneqarput Nuugaartiarmiunik suli maqaasisaqartoqartoq. Taamaammat kaammattuutigissavara innuttaasut Nuugaatsiami najugalittut nalunaarsorneqarsimasut allamiillutilli sulilu ilaqutaasut oqarasuartarfiannut nalunaaruteqarsimanngitsut sapinngisamik piaarnerpaamik uunga nalunaaruteqassasut oqarasuaat +299 36 52 49.

Erseqqissarusuppara uanga aamma Naalakkersuisut innutaasunut attorneqartunut ilaqutaasunullu pissutsinik tamakkuninnga eqqorneqartunik misiginneqatiginnikkatta. Neriuutigaara upalungaarsimanermik suliaqartut nalunaaquttap akunnerini tulliuttuni qaninnerni inuit maqaasineqartut sumiissusersisinnaalerumaaraat.

Pilersaarutigaara periarfissaqaleriaruma Naalakkersuisoq Erik Jensen peqatigalugu taavunnassallunga innuttaasunillu oqaloqatiginnillunga.”