Nuummi Noorlerni Saqqarlernilu inissiat pisoqqat isaterinneqarnissaannut killiffik

Piffissami kingullermi Nuummi Noorlernut 16 & 18-imi aamma Saqqarlernut 1 & 3-mi illut qanoq pineqarnissaat eqqartorneqarsimavoq. Naluneqanngitsutut illut sivisuumik inoqarsimanngillat.

Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoqarfimmiit (KNIAIN) nalunaarutigineqarsinnaavoq illut isaternissaat pilersaarutigineqarmat. Maanna illut avatangiisinut qanoq sunniuteqarsinnaanerat misissorneqarpoq, illut isatinnginneranni avatangiisinut peqqissutsimullu ajoqutaasinnaasunik akoqarnersut misissorneqartussaammata. Taamaammat piffissami aggersumi illuni eqqaanilu sulisoqarnera takuneqarsinnaassaaq.

Avatangiisinut qanoq sunniuteqarsinnaanerisa misissornera naammassippat allakkat suliariumannittussarsiornermi atugassat suliarineqassapput, isaterneri sullivimmi avatangiisit eqqarsaatigalugit eqqortumik ingerlannissaa taavalu eqqagassat maleruaqqusat atuuttut najoqqutaralugit immikkoortiterneqarnissaat tassuuna qularnaarneqassalluni.

Suliariumannittussarsiuussinissaq aasaq manna ingerlanneqassasoq pilersaarutigineqarpoq, suliamillu tunniussinermi inernerit apeqqutaatillugit illut taakku sisamat ukioq manna isaterneqarnissaat pilersaarutaavoq.

Tusagassiorfinnut nalunaarut una pillugu allanik apeqqutissaqartoqaruni immikkoortortami pisortaq Embla Kristjánsdóttir, e-mail emki@nanoq.gl-kut attaveqarfigineqarsinnaavoq.