Royal Greenland Sisimiut Kangaatsiallu eqqaanni umiarsuarmik tunitsiviliisinnaavoq

Stemningsbillede

Royal Greenland umiarsuarmik sukkulluunniit Kangaatsiap eqqaani tunit­sivileeriaannaavoq. RG-mi Sisimiunit Kangaatsiamut umiarsuarmik tunit­siviliinissamut Aalisarnermut Piniarnermullu Naalakkersuisoqarfimmit akuerineqareerpoq, taama Aalisarnermut Piniarnermullu Naalakker­suisoq Karl-Kristian Kruse Inatsisartunut ilaasortap Nikolaj Jeremiassenip Kangaatsiap eqqaani umiarsuarmik tunitsivileeqqusilluni noqqaassu­taanut akissuteqarluni oqarpoq.

Inatsisartut Aalisarnermut, Piniarnermut aamma Nunalerinermut ataatsi­miitsitaliaata siulittaasua, Hans Aronsen aperivoq Sisimiut Kangaatsiallu eqqaanni umiarsuarmik qanittukkut tunitsiviliisoqarniannginnersoq.

Aalisarnermut Piniarnermullu Naalakkersuisoq Karl-Kristian Kruse juunip 12-anni 2017-imi ilaatigut ima  akivoq:

- Siullermik erseqqissassavara umiarsuarmik tunitsiviliisinnaasut tas­saam­mata ullumikkut tunitsiveqartitsereersut. Tamanna tunngavili­gaavoq umiarsuarnik tunitsivinnik periusissiakkut aalajangersar­neqar­simalluni.

Royal Greenland Sisimiut eqqaanni aamma Kangaatsiap eqqaani tunit­siveqartutut umiarsualiinissaminik qinnuteqarmat akuersissu­tigine­qarsimavoq.

Taamaammat Naalakkersuisutut naatsorsuutigivara Kangaatsiap eqqaani pisariaqartitsisoqarnerani RG umiarsuarmik tunitsiviliissasoq, Karl-Kristian Kruse oqarpoq.

Aalisarnermut Piniarnermullu Naalakkersuisoq erseqqissaavoq Naalak­kersuisut aalisartut pitsaanerpaamik atugaqarnissaannik kissaati­gim­massuk, ilisimatitsissutigalugulu umiarsuarmik tunitsiviliinissamut periu­sissiaq tunngavigineqartoq inuussutissarsiortut sinniisaasa suliarisi­mammassuk.

Attavigineqarsinnaavoq Aalisarnermut Piniarnermullu Naalakkersuiso­qar­fimmi pisortaaneq, Jørgen Isak Olsen. Email: jio@nanoq.gl