Pisiniarfiup saavani erngunneq naammaleqaaq

Tasiilami marlunngornermi innuttaasunik ataatsimiititsinermi taamatut paatsoorneqarsinnaanngitsumik oqariartuuteqartoqarpoq. Akissarsiffiup pisortanillu ikiorsiissutinik tunniussisoqarnerata nalaani inuit aalakkuttut tassaniittarmata meeqqat amerlasuut atuariartornissaminnut timersortarfiliarnissaminnullu annilaangasarput toqqissisimanatillu.

Imigassanik aalakoornartortalinnik tuniniaaneq illoqarfiup qeqqaniit peertariaqarpoq allamiillu tuniniaasoqartariaqaraluarluni, meeqqat inuusuttullu sumiiffigisaannit peerlugu. Aningaasanoorajunneq aamma ajornartorsiutitut annertuutut oqaatigineqarpoq.

”Ajortut naaffeqanngitsuaniippugut” innuttaasunik ataatsimiisitsinermi oqariartuutit ilagaat suliffissaaleqisunullu ilinniarnissamut periarfissanik amigaateqarluta.

Kultur-ikkut illorsuarmik kissaateqartoqarpoq inuusuttunullu sukisaarsartarfinnik taamatuttaaq ilinnialernissamut periarfissat praktikkerfissallu annertuumik kissaatigineqarput. Innuttaasut aamma kissaatigaat inuttut ineriartornissamut ikiortissaqarnissamik periarfissaqarneq, imminut toquttarnermut pinaveersaartitsinermut pikkorissarneq angutinullu højskole.

Uparuartorneqarportaaq nerisassanik peqqinnartunik amigaateqarneq, inuussutissarsiornermik ineriartortitsineq ilinnialernissamullu periarfissat ilinniarsimasunut ilinniarsimanngitsunullu isiginnilluni isumaginnittut.

Peqqissutsimut Naalakkersuisoq Agathe Fontain innuttaasunik ataatsimiisitsinermi imigassamik aalakoornartortalimmik inatsimmut aammalu atornerluinermut inatsimmut pilersaarutit saqqummiuppai taamatuttaaq Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq Doris Jakobsen Tasiilami immikkut ittumik suliniutit saqqummiuppai, tassani ilaatigut nutaamik ilinniarfeqalernissaq, inuussutissarsiornerup ineriartortinnissaa, imminut toquttarnermut pitsaaliuineq, angutinut oqallittarfik ilinniarsimasunullu piginnaasanik ineriartortitsineq saqqummiunneqarlutik.

Paasisaqarnerorusuttut attavigisinnaavaat Naalakkersuisoqarfimmi pisortaq Tine Pars, oqarasuaat: +299 55 75 57 imaluunniit e-mailikkut: tine@nanoq.gl