Aarrinit tunisassiat takornarianit nassarneqarsinnaanngoqqipput

Aarrinit nioqqutissiat nunatsinnit anniseqqusaajunnaarallartinneqarnerat Juunip 13-ani 2017 atuutilersumik atorunnaarsinneqarpoq, aarrinik piniarneq nungusaataanngitsumik ingerlanneqartoq nalilerneqarmat. Taamaalillutik takornariat aarrinit nioqqutissianik pisinerminni CITES-imit akuersissummik pisinnaanngorput, pisiatillu nunatsinnit aallarnerminni nassarsinnaanngoqqillugit.

Washington – konvention, aamma CITES-imik taaneqartartoq tassaavoq uumasunik naasunillu nungutaanissamut navianartorsiortitaasunik nioqquteqarnerup angallassinerullu nalunaarsornissaanut nakkutigineqarnissaanillu nunarsuarmiut isumaqatigiissutaat. Isumaqatigiissutip kinguneraa nunanut allanut uumasut naasullu ilaannik nassarnermi akuersissutit aalajangersimasut piumasarineqartarnerat ilaatigullu uumasut naasullu ilaat nassarneqarsinnaanerat inerteqqutaasarluni.

2016-imi Aggustip aallaqqaataani aarrit anniseqqusaajunnaarallaraluarput, aarrit piniagaanerat nungusaataanngitsumik ingerlanneqanngitsutut Pinngortitaleriffimmit piffissami tassani nalilerneqarmat. CITES-imi nunat tamalaat akornanni piumasaqaatit malittarisassallu isumaqatigiissutigineqartut malillugit naliliineq ingerlanneqartarpoq.

Ukioq manna kisitsisit kingulliit malillugit aarrit piniagaanerat nungusaataanngitsumik ingerlanneqarpoq. Takornariallu aarrinit nioqqutissanik nassarsinnaanngoqqipput, pisiffimminni CITES-imit akuersissummik pisimagunik. CITES-imit akuersissutit tammajuitsussarsiniartarfinni imaluunniit CITES-ip allaffianut Pinngortitamut Avatangiisinullu Naalakkersuisoqarfimmi saaffiginninnikkut pissarsiarineqarsinnaapput.

Paasisaqarnerorusukkuit immikkoortortami pisortaagallartoq Signe Eberhard Trykker saaffigisinnaavat, tlf. 345473, E-mail: pan@nanoq.gl