Isumaginninnermut Naalakkersuisoq tamanit iliuuseqaqqusivoq

Isumaginninnermut Naalakkersuisup Sara Olsvig-p isumaginninnikkut suliassat ataatsimoorussamik piaartumillu iliuuseqarfigineqarnissaat pillugu naalakkersuisoqatini arlallit Nunatsinnilu borgmesterit ataatsimeeqatiserai.

Isumaginninnermut, Ilaqutariinnermut, Naligiissitaanermut Inatsisinillu atuutsitsinermut Naalakkersuisoqarfiup Nakkutilliinermik ingerlatsiviata 2016-mili pilersinneqarami maanna Nunatsinni illoqarfiit 18-iusunit 15-t tikillugit nakkutilliiartorfigereersimavai. Qaanaaq, Upernavik Uummannarlu taamaallaat nakkutilliinermik ingerlatsivimmit tikeraarneqarnissaat amigaataavoq.

Kommunit tamakkerlutik ingammik meeqqanut inuusuttunullu suliassatigut annertuumik unammillernartumik inissisimanerat nakkutilliinerit takutippaat.

”Naalakkersuinikkut suliassaqarfiit kommunillu akimorlugit ataatsimoorussamillu iliuuseqartariaqarpugut. Immikkut ittumik iliuuseqarnikkut aatsaat unammilligassat nunguternissaat naammassisinnaavarput”, Isumaginninnermut, Ilaqutariinnermut, Naligiissitaanermut Inatsisinillu atuutsitsinermut Naalakkersuisoq Sara Olsvig oqarpoq nangillunilu:

”Naalakkersuisut isumaqatigiilluta isumaginninnermut suliassaqarfik pingaarnersiorsimavarput. Isumaginninnermut aqutsisoqarfimmik pilersitsivugut meeqqallu tapersersorneqarnissaannut inatsit Inatsisartunit isumaqatigiissunit akuerineqareerluni. Pingaarnersiuinerli tassunga unissanngilaq. Meeqqat ajunnginnerusumik atugaqalernissaannut suliniuteqarnitsinni isumaginninnerup saniatigut suliassaqarfinni allani aamma iliuuseqarnerusariaqarpugut. Angajoqqaat toqqissisimaffigisinnaasaminnik pitsaasunillu suliffissaqassapput, atornerluinernut katsorsartinnissamut periarfissaqassapput, ilinniarnissamut periarfissaqassapput ilaqutariillu atugarliortut toqqissisimanartunik inissaqartinneqassapput. Ataatsimut isiginnittariaqarpugut. Taamaammat qanoq ililluta pitsaanerpaamik piaarnerpaamillu ataatsimoorussamik iliuuseqarnissarput pillugu naalakkersuisoqatikka arlallit pingaarnertullu Naalakkersuisut Siulittaasuat ataatsimeeqatiserissavakka”.

Nakkutilliinermit nalunaarusiat kommunini isumaginninnermut ingerlatsivinni pissutsinik takutitsipput. Kommunit ilaanni illoqarfiit ataasiakkaat ingerlalluaraluartut kommunini tamani ingerlatsivinni annertuumik ajornartorsiortoqartoq nalunaarusiat takutippaat.

”Borgmesterit borgmesterinngortussallu nutaat sulillutik aallartissimalerput. Taamaammat Naalakkersuisut isumaginninnermut aqutsisoqarfik aqqutigalugu kommuninut assatsinnik isaassinitsinnik kinguneqarluartumik tigusilluarnissaat suliassanullu tapersiilluarnissaat pillugu tamakkerlugit aasartinnagu ataatsimeeqatiserissavakka. Ataatsimoorluta suliassat kivinnissaannut kommunit ilisimasaminnik avitseqatigisariaqarpaatigut pingaarnertullu suliassamut ilaalluartariaqarlutik. Meeqqat ilaqutariillu atugarliortut salliutillutigit politikkikkut ataatsimoortariaqarpugut”, Sara Olsvig oqarpoq.

Isumaginninnermut, Ilaqutariinnermut, Naligiissitaanermut Inatsisinillu atuutsitsinermut Naalakkersuisoqarfik kommuninut qinersinerup kingorna ukioq ataaseq qaangiutsinnagu kommunalbestyrelsinik isumaginninnermullu ataatsimiititalianik aamma pikkorissaasussaatitaavoq.

Nakkutilliinermik ingerlatsiviup Qaanaaq, Upernavik Uummannallu ukiamut tikinnissaat pilersaarutigaa.

Allanik apeqqutissaqaraanni una attavigineqassaaq: Naalakkersuisup allattaa Nina Jul Larsen, Mobil +299 53 93 71, mail: nina@nanoq.gl