Suli Kuannersuarni suliniummi aalajangiissuseqartumik sunniuteqartoq

Inatsisitigoortumik naliliinerup ersersippaa Greenland Minerals & Energy suli Kuannersuarni suliniummi aalajangiissuseqartumik sunniuteqartoq

Aatsitassanut oqartussaasut Greenland Minerals & Energyp (GME) Kiinamiullu aningaasaliisartup isumaqatigiissutaat nalilerpaat. Kiinamiut aningaasaliisartup GME-mi aalajangiisinnaassuseqartumik sunniuteqannginnera naliliinerup takutippaa.

Ukiarmi Kuannersuarni suliniutip Kiinamiut aningaasaliisartutut suliffeqarfiutaannut tunniunneqarsinnaanera aarlerinaateqartoq tusarneqarpoq. GME-p piginneqataassutaasa 12,5 %-iisa Leshan Shenghe Rare Earth Co. Ltd.-imut tunineqarnerat, kingullertut taaneqartup kingusinnerusukkut GME-mi aalajangiisinnaassusilimmik sunniuteqarsinnaanngorluni pisinissamut pisinnaatitaaffeqartoq tusarneqarpoq.

Aatsitassanut Naalakkersuisoqarfimmeersoq Jørgen T. Hammeken-Holm oqarpoq: - Oqartussaasutut Aatsitassanut inatsisip aalajangersagaasa apeqqutini imaattuni malinneqarnerat qulakkiissallugu pisinnaatitaaffigalugulu pisussaaffigaarput. Misissuinissamik akuersissut, Kuannersuarmi suliniutip toqqammavigisaa Naalakkersuisut akuersiseqqaarnagit allanut tunniunneqarsinnaanngitsoq, aatsitassanut inatsimmi erseqqissumik aalajangersarneqarpoq. Tamanna aamma toqqaannanngitsumik tunniussinermi atuuppoq, taamaaliornermi akuersissut suliffeqarfimmi ataasiinnarmiikkaluartoq, taamaattoq suliffeqarfimmi aalajangiisinnaassusilimmik piginneqataasut allanngortut, taanna nassuiaavoq.

Aatsitassanut Naalakkersuisoqarfik suliaq erseqqissumik misissuiffigiumallugu GME-mut attaveqarpoq. Eqqartuusissuserisut avataaneersut suliffeqarfinnik tunniussinermik immikkut ilisimasallit isumaqatigiissuteqarfigineqarput, taakkulu suliffeqarfiup piginnittuusup Leshan Shenghe Rare Earth Company-llu isumaqatigiissutaat Aatsitassanut Naalakkersuisoqarfik sinnerlugu misissorpaa.

Aatsitassanut Naalakkersuisoqarfimmeersoq Jørgen T. Hammeken-Holm oqarpoq: - Nalilersuineq manna naammassivoq, inatsisillu naapertorlugit naliliineq ersarilluinnarpoq: Isumaqatigiissummi Leshan Shenghe GME-p piginnittuanut suliffeqarfimmut aalajangiisinnaassusilimmik tigusinissamut pisinnaatinneqanngilaq. Isumaqatigiissummi Leshan Shenghe taamaallaat GME-p 12,5 %-ianik pisinissamik pisinnaatinneqarpoq. GME-p Kalaallit Nunaanni suliffeqarfiani aalajangiisinnaassusilimmik sunniuteqarneq suli suliffeqarfiup piginnittuani Greenland Minerals and Energy Ltd-miippoq.

Una misissuineq erniinnartumik GME-ip piianissamut qinnuteqaataanut naliliinissamut attuumassuteqanngilaq.

Erseqqinnerusumik paasisaqarumalluni uunga saaffiginnittoqarsinnaavoq:
Naalakkersuisoqarfiup pisortaa Jørgen T. Hammeken-Holm, e-mail: joeh@nanoq.gl, oqarasuaat: +299 34 68 46