Nunani Avannarlerni Ministerit Siunnersuisoqatigiiffiata ataatsimiinnerani kalaallisuumiit kalaallisuumut oqalutseqartarneq

Nunat avannarliit ataatsimiinneranni kalaallit ilaasortat kalaallisuumiit kalaallisuumut oqalutseqartittarnissaat pillugu kalaallit ilaasortaat kissaateqarlutik Kalaallit Nunaat sinnerlugu Nunat Avannarliit Siunnersuisoqatigiiffiannut aamma Nunani Avannarlerni Ministerit Siunnersuisoqatigiiffiannut pisortatigoortumik ulloq 9. november 2016 allagaqarput. Allakkami kalaallit Nunat Avannarliit Siunnersuisoqatigiit suleriaasiannut ilanngunneqassasut siunnersuutigineqarpoq, soorluttaaq Islandimiunut Finlandimiunullu tunngatillugu taamaattoq. Tassa nunani avannarlerni kalaallit oqaasii akuersaarneqassasut, taamaattumillu ministerit ataatsimiinneranni kalaallisuumiit aamma kalaallisuumut oqalutseqartoqartassasoq. Kalaallit Nunaata saaffiginninnera immikkut Nunat Avannarliit Siunnersuisoqatigiivinit aamma Nunani Avannarlerni Ministerit Siunnersuisoqatigiivinit suliarineqarpoq.

Nunani Avannarlerni Ministerit Siunnersuisoqatigiivisa suliaq suliarisimavaat, siunissamilu Nunani Avannarlerni Ministerit Siunnersuisoqatigiivisa ataatsimiinneranni Finlandimiut Islandimiullu assigalugit kalaallisuumiit kalaallisuumut oqalutseqartitsisoqartalissaaq.

- ”Nunani Avannarlerni Ministerit Siunnersuisoqatigiivisa aalajangiinerat nuannaarutigeqaara, tamatumunngalu pissutigaara uanga nammineq ilitsoqqussaralugu oqaatsikka atorlugit naalakkersuinikkut oqallinnernut peqataasinnaalissagama," oqarpoq Peqqissutsimut Nunanilu Avannarlerni Suleqatigiinnermut Naalakkersuisoq Agathe Fontain.

- ”Nunani Avannarlerni Ministerit Siunnersuisoqatigiivi nunat avannarliit akornanni naalakkersuinikkut oqallittoqarnerani ukiuni kingulliunerusuni pingaaruteqalersimavoq. taamaammallu Nunani Avannarlerni Ministerit Siunnersuisoqatigiivini sulinitsinni assigiimmik atugassaqartinneqarnissarput pingaaruteqarpoq, soorlu Issittoq, EU apeqqutillu soqutiginaatillit allat eqqartorneqassatillugit," naggasiivoq Agathe Fontain.

Paasissutissat allat pissarsiarerusukkukkit saaffissaavoq: AC-Fuldmægtig Monika Paulli Andersen, oqarasuaat angallattagaq +299 553320 imaluunniit e-mail: mopa@nanoq.gl