Ammerivimmi - Greenland Seal Centerip atoqqaartinnera

Naalakkersuisut Takornariartitsinermut periusissiaata ilaattut Qaqortumi Great Greenland ullumikkut tikeraat ornittagaanni nutaami pisortatigoortumik tikilluaqqusivoq. Ullumikkut Ammerivik Namminiilivinnermut, Nunanut Allanut Nunalerinermullu Naalakkersuisumit, Suka K. Frederiksenimit pisortatigoortumik ammarneqarpoq.

Ammerivik - Greenland Seal Center tassaavoq Kalaallit Nunaanni tikeraat ornittagaat ammarneqartoq siulleq. Ornittakkap puisit amii, puisit amiinik mersortarneq, aamma tassunga atasutut Kalaallit Nunaanni kultureqarnikkut oqaluttuassartaq pillugu paasissutissiisassaaq.

Ammaanermi siulliulluni oqalugiarpoq Namminiilivinnermut, Nunanut Allanut Nunalerinermullu Naalakkersuisoq, Suka K. Frederiksen. Tikeraat ornittagaannik nutaamik Kalaallit Nunaat pilluaqquaa imatut oqaaseqarluni:

“Great Greenland tassaavoq suliffeqarfik tulluusimaarutigisarput, aamma suliffiuvoq Qaqortumut aamma tunisaqartartunut piniartunullu amerlasuunut maani suliffissuarmut nioqqutissiassanik pilersuisunut annertuumik pingaaruteqartoq. Great Greenlandimi sulisut piginnaasaannik pilersitsisinnaassusermik pikkorissusermillu saqqummersitsineq torrallataasumik takutitsivoq.”

Suka K. Frederiksen nangilluni ilaatigut oqarpoq: “Tikeraat Kalaallit Nunaannit puisit amiinut ambassadøriulluarlutik pisisartuullutillu manna qimattassagaat neriuutigaara.”

Ammaanermi takkupput Great Greenlandimi sulisut, Kommune Kujallermit sinniisuutitat, najukkami suliffeqarfiit, kiisalu najukkami eqqumiitsuliortut ilusilersuisartullu saqqummersitsinermik suliarinneqataasimasut.

“Neriuutigisara tassaavoq siunissami ukiuni takkuttussani inuppassuarnut ilisimasanut isumassarsianullu tikeraat ornittagaat pilersueqataajumaartoq, aammalu puisi, taassumalu oqaluttuarisaanermi inissisimaffia pillugit tikeraat ornittagaat ataatsimoorussatut kalaallini eqqaamasassiiffittut atuutissasoq,” oqalugiaammini Great Greenlandip pisortaanera Ditte Sorknæs ilaatigut oqarpoq.

Tikeraat ornittagaannut ingerlannerani, tassanilu ilaasunut mersortarfimmut pisiniarfimmullu Naalakkersuisut aningaasanut inatsimmi koruunit 2 millionit immikkoortissimavaat. Isaariaanut assiaqut qiorneqareermat Suka K. Frederiksen Greenland Seal Centerimi takornariartinneqarpoq. Tamatuma kingornatigut Great Greenlandip matut pisortatigoortumik kikkunnut tamanut ammarpai, aammalu tikeraat ornittagaannik ammaanersiorneq aamma Great Greenlandip ukiunik 40-nngortorsiornerata nalliussinerani kaffillerluni.