Qaanaap aqutsiveqarfiani amaqqut iliuuseqarfigineqartut

Qaanaap aqutsiveqarfiani amaqqut ukiuni kingullerni takussaagaluttuinnarnerat Aalisarnermut Piniarnermullu Naalakkersuisoqarfimmut (APN) saaffiginnissutigineqartarpoq ilaatigullu kissaatigineqarluni amaqqut immikkut iliuseqarfigineqarnissaat. Qaanaarmiut inuttaasut 128-it atsiugaannik APN-imut allakkatigut saaffiginnissuteqarput amaqqut iliuuseqarfigineqarnissaat kissaatigalugu.

Amaqqut taavani inunnut ulorianarsinnaasutut isigineqarput taamatullu piniakkanut akornusiisinnaasutut isigineqarlutik. Qaanaap aqutsiveqarfiani tuttut umimmaallu amaqqunit sunnerneqartarnerat APN-imut oqaatigineqartarpoq ilaatigullu umimmaat Inglefield Land-imeersut Siorapaluup eqqaanut kujavarternerannut amaqqut peqqutaasorineqarlutik.

Amaqqut pillugit nalunaarutip atuuttup 1988-imeersup allanngortinnissaa APN-imi sulissutigineqarpoq Qaanaap aqutsiveqarfiani amaqqut taamaalillugit piniarneqarsinnaanissaat siunertarineqarluni. Nalunaarummut siunnersuutip ukiaq manna tusarniutaanissaa pilersaarutaavoq.

Amaqqut piniarneqarsinnaalerneratigut inoqarfinnut takkusimaartarunnaassanersut oqaatigereersinnaanngilarput, inunnut ulorianarsinnaasunik piniakkanullu sunniisinnaasunik ajornartorsiutaasunik millisaasinnaasutut isigineqarpoq.

 

Paasissutissat sukumiinerusut uunga saaffiginninnikkut pissarisarineqarsinnaapput:
AC-Fuldmægtig Nuka Møller Lund
Aalisarnermut Piniarnermullu Naalakkersuisoqarfik
Tlf.: +299 34 53 45
Mail: numl@nanoq.gl