Naalakkersuisut Siulittaasuat Kim Kielsen naalagaaffeqatigiinneq pillugu Danmarkimut ataatsimiigialerpoq

Ministeriuneq Lars Løkke Rasmussen, Savalimmiuni Lagmandi Aksel V. Johannesen aamma Naalakkersuisut Siulittaasuat Kim Kielsen ukiumoortumik juunip 13. – 14.-ianni naalagaaffeqatigiinneq pillugu Bornholmimi Christiansø-milu ataatsimiissapput.

Naalakkersuisut Siulittaasuata, Ministeriunerup Lagmandillu naalagaaffeqatigiinnermi apeqqutit assigiinngitsut oqaloqatigiissutigissavaat.

Kim Kielsen ima oqaaseqarpoq:

”Danmarkimiit Savalimmiuniillu suleqatikka naapinnissai qilanaareqaara.

Naalakkersuisut Savalimmiunilu naalakkersuisut savalimmiormiut tunitsivitoqaanni torersaassinissamut suleqatigiilluarnerat eqqarsaatigalugu, Kalaallit Nunaanni saliinissaq pillugu Naalagaaffeqatigiit ataatsimiinneranni qaqitassama ilagaat.

Annertunerusumik nammineq aalajangiisinnaassuseqalernissaq namminiilivinnissarlu pillugit anguniagaqarnerput ataatsimoorfigisavullu eqqarsaatigalugit, naalagaaffeqatigiinneq qanorlu suleqatigiinnitta ineriartortinnissaa oqaloqatigiissutigiuartariaqarparput.”

Naalagaaffeqatigiinneq pillugu ataatsimiinneq pisarneq malillugu tusagassiortunik katersortitsinermik naggaserneqassaaq. Tamanna pissaaq Christiansø-mi, Grønningen-imi juunip 14-iani nal. 15.15.

Naalagaaffeqatigiinneq pillugu ataatsimiinnerit persuarsiunngitsumik naalakkersuisut siuttuinit ingerlanneqartarput.

Naalagaaffeqatigiit kingullermik Kalaallit Nunaanni 2016-imi ataatsimiipput.

Paasisaqarnerorusuttut attavigisinnaavaat Naalakkersuisumut allatsi Karen Motzfeldt oqarasuaat +299 56 24 50 imaluunniit e-mail karm@nanoq.gl.