Naalakkersuisut ungasianit ilinniartitsinermi tapiissuteqartarnermut ammapput

Ungasianit ilinniakkat ingerlanneqarsinnaasut neqeroorutigineqartartut amerliartuinnarput, ilutigisaanik ilinniakkanik aallartitsinngitsut periarfissaat Naalakkersuisut amerlisarniarpaat. Taamaammat Ilinniartitaanermut Naalakkersuisup Doris Jakobsenip ungasianiit ilinniartitsinermi ilinniartunut tapiissutit ammaanniarpai amerlanerusut naammassillutik ilinniagaqarnissaat anguniarlugu.

Namminersorlutik Oqartussat ukiorpassuarni ungasianit ilinniarnernut tapiisarnissanut ammaassinissaq tunuarsimaarutigisimavaat. Uani ilinniartitseriaaseq pineqartoq tassa taamaallaat qarasaasiaqarluni internetimullu attaveqarneq atorlugu ilinniartitsinernik malinnaaviginnissinnaaneq imaluunniit illoqarfimmut nunamullu ilinniarfiusumut ilinniakkamik neqerooruteqartoq tikinngikkaluarlugu. Peqqutaasut annerpaat ilaat tassaasimavoq taamatut ilinniakkat qanoq pitsaatiginersut nalornissutigineqartarsimammat aningaasartuutinut sanilliullugu ilinniarniartut qanoq pissarsissutigisinnaaneraat qularineqartarsimammat, ungasianit ilinniakkat arlaallit illoqarfimmut ilinniarfiusumut angalanerit arlalissuit atorlugit ilinniakkat immikkoortuisa ilaasa najuunnissaq pisariaqartittarmassuk.

Naalakkersuisut aalajangernerat ungasianit ilinniartitsinernut tapiissutit annertussusii eqqarsaatigalugit ilinniarnernut nalinginnaasunut naligiisinneqarnerannik kinguneqassaaq. Nalunaarusiaq nutaaq aqqutigalugu ilinniarnermi tapiisarneq takuneqarsinnaajumaarpoq, taanna aasaanerani sulinngiffeqannginnerani aalajangerneqarnissaa naatsorsuutigineqarpoq aggustillu aallaqqaataani ukioq manna atulersinneqarluni. Tapiissutip ilinniakkanut allanut tapiissuteqartarnerit malittarisassaat assigalugit atuukkumaarpoq ilinniarnermik ingerlatsinikkut ilinniakkallu pitsaassusaannut piumasaqaatini.

Ilanngullugu taaneqassaaq Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfiup tamatuma saniatigut GUX ungasianit ilinniartitsinertut ingerlanneqarsinnaanerata periarfissaasinnaanera misissormagu.

Kiisalu malugeqquneqarpoq, Ombudsmandip suliaq saqqummiuteqqammermagu Namminersorlutik Oqartussat siusinnerusukkut ilinniartitaanermi malittarisassiuussinikkut periuserisarsimasaanut tunngasoq. Suliaq peqqutigalugu ungasianit ilinniartitsinernut taperneqarnissamik qinnuteqaatit ikittunnguit tunniunneqarsimasut siornatigut periuseq malillugu itigartinneqarsimagaluartut nutaamik nalilersoqqinneqassapput.

Ersarinnerusumik paasissutissanik paasisaqarusukkuit saaffigiuk: Naalakkersuisup allattaa Rosa Thorsen, oqarasuaat: 553303