Siunissami silap pissusia nunalerinermut pitsaasunik periarfissiivoq

Silap pissusiata allanngoriartornera eqqarsaatigalugu nunalerinermik inuussutissarsiornermi periarfissat ajornartorsiutaasinnaasullu nassuiaatip nutaap ersersippai. Siunissami silap pissusianut nunalerinermi naleqqussarnissamut sulinermi nassuiaat atorluarneqarsinnaassaaq.

”Silap pissusiata allannguutai tamatsinnut sunniisarput. Taamaattumik silap pissusiata allanngornerata inuiaqatigiinnut qanoq periarfissiillunilu ajornartorsiortitsisinnaanera nalunngittariaqarparput. Silap pissusianut naleqqussarnissamut nassuiaat una nassuiaatit pingajoraat, nunalerinermilu siunissami silap pissusianut naleqqussarnissaq periarfissanillu atorluaanissaq nassuiaatip siunertaraa.“ Taama oqarpoq Naalakkersuisut Siulittaasuat Kim Kielsen.

Silap pissusiata allanngornera periarfissiivoq

Pinngortitamut Avatangiisinullu Naalakkersuisoqarfik silap pissusianut naleqqussarnissamut nassuiaammik nutaamik saqqummersitsivoq Namminiilivinnermut, Nunanut Allanut Nunalerinermullu Naalakkersuisoqarfik suleqatigalugu. Ukiup ilaani naajartorfik sivisunerusoq kissarnerusorlu naatsorsuutigineqarsinnaasoq, tamannalu Kalaallit Nunaata kujataani savaatilinnut nunalerisunullu iluaqutaajumaartoq nassuiaat ersersitsivoq. Uumasuutilinnut tunisassiornermut pingaaruteqartumik, sivisunerusumik ivikkanik naatitsisoqarsinnaalissaaq. Ivigaqarnerujartortillugu, uumasuutit ivigartortut amerlanerusut inissaqalissapput. Aammattaarli piffissat panernersuaqarfiusut amerlanerusut naatsorsuutigineqarsinnaapput, taamaattumillu imertereriaatsit allanillu nerukkaatissatut naatitsisinnaanerit eqqarsaatigilluarneqartariaqarlutik.

Tulleriiaat pingajuat

Silap allanngorneranut naleqqussarnissamut nassuiaatit tulleriiaat pingajuattut suliaavoq. Nassuiaatit tamarmik inuussutissarsiummut allamut tunngapput. Siulleq saqqummersinneqarpoq 2012-imi sammisaralugillu aalisarnermik- piniarnermillu inuussutissarsiuteqarneq, aappaa 2015-imi saqqummersinneqarluni umiarsuarnillu angallanneq sammillugu.

Nassuiaat uani atuarneqarsinnaavoq.

 

Paasissutissanik amerlanerusunik pisoqarsinnaavoq immikkoortortaqarfimmi pisortaagallartoq, Signe Eberhard Trykker, tlf. 34 54 73, e-mail: siek@nanoq.gl.