Kalaallit Nunaanni Naligiissitaanermut Siunnersuisoqatigiit siulittaasortaarput

Elisa Petersen 2018-ip naanissaata tungaanut Naligiissitaanermut Siunnersuisoqatigiit siulittaasortaassaattut Naalakkersuisut toqqarpaat.

Dorthe Korneliussen Naligiissitaanermut Siunnersuisoqatigiit siulittaasuattut tunuarnissaminik kissaateqarsimammat Elisa Petersenip taarserpaa.

Elisa Petersen januar 2015-imiit Naligiissitaanermut Siunnersuisoqatigiinni ilaasortaasimavoq. Elisa Petersen atuagaateqarfilerinermi-ilisimatitsissuteqartarnermilu ilisimatusarsimavoq tamatumalu saniatigut aqutsisutut ilinniarsimalluni. Elisa Petersen Nunatta Atuagaateqarfiani pisortatut 1994-imili atorfeqarpoq.

”Naligiissitaanermut Siunnersuisoqatigiit siulittaasortaavata suleqatiginissaa qilanaaraara. Naligiissitaanermut Siunnersuisoqatigiit pingaarutilinnik suliassaqarput ilaatigut pingaartitarisussaagamikku maani inuiaqatigiinni arnat angutillu akornanni naligiissitaaneq qanoq siuarsassaneripput”, Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoq Sara Olsvig toqqaasoqarnerani oqaaseqarpoq, ilanngullugulu, ”Dorthe Korneliussen qujassuteqarfigerusuppara Naligiissitaanermut Siunnersuisoqatigiinni siulittaasutut suliuniutigisimasai pillugit, ilaatigut inuiaqatigiinni angutit atugarisaasa ukkatarineqarnerat suliniutigisimammagu.”

Peqatigitillugu Kathrine Bødker Naligiissitaanermut Siunnersuisoqatigiinnut ilaasortassatut toqqarneqarpoq, taamatuttaaq 2018-ip naanissaata tungaanut.

Naligiissitaanermut Siunnersuisoqatigiit ilaatigut suliassaraat "arnat angutillu akornanni naligiissitaanissamik inatsisip atuutsinneqarnerata nakkutigineqarnissaa" aamma "ingerlatanik paasissutisseerpalaartunik oqallinnermillu pilersitsisartunik aallartitsisassallutik".

Naligiissitaanermut siunnersuisoqatigiit naalakkersuinermut attuumassuteqanngillat namminerisaminnillu allattoqarfeqarlutik.

Paasisaqarnerorusukkuit Niels Thomas Andersen attaveqarfigiuk, oqarasuaat 34 53 39