Imigassaq pillugu inatsit meeqqat pitsaanerusumik atugaqalernissaannik nassataqassaaq

Imigassaq pillugu inatsisissamut nutaamut siunnersuut Atassutip Inuusuttaannit uparuarneqarpoq oqarlutik tamanna isertorlutik imigassamik tuniniaasartut amerlinerannik kinguneqassasoq aammalu takornariartitsinermik ingerlataqartunut akimmisaartitsissasoq. Peqqissutsimut Naalakkersuisoq Agathe Fontain akissuteqarpoq imigassaq pillugu inatsit kikkunnut iluaqutaassanersoq uagut inuiaqatigiittut eqqarsaatigisariaqaleripput:

Imigassaq pillugu inatsisip oqallisigineqarnerani oqaaseqartartut uteqattaaripput. Imigassamut tunngasutigut sutigulluunniit killilersuisoqannginnissaanik kissaateqanngitsut. Naak imigassamik atuinermik pitsaaliuinermi sukaterisoqarnissaa killilersuisoqarnissaalu nunarsuaq tamakkerlugu peqqinnissamik suliniaqatigiiffiup WHO-p kaammattuutigigaluaraa sukaterinerit iluaqutaanavianngitsut oqaaseqartut tunngavilersuutigaat. WHO-p kaammattuutai asuliinnaanngillat, iliuusissat suut iluaqutaanerussanersut pillugu ilisimatusarnermik tunngaveqarput.

Meeqqat tapersersorusuppakka ullumi meeqqat ulluanni aamma ukiup ulluini tamani. Maannami inuiaqatigiinni ajornartorsiutitta annerpaap, tassalu imigassap aalakoornartullip oqallisiginerani meeqqat isumaat maanna ilanngunneqanngillat. Aap, aamma nalunngilluinnarparput annertuumik ajornartorsiortoqartoq. TAmanna politiinit, isumaginnermut suliaqartunit peqqinnissaqarfimmillu uppernarsarneqarpoq aammalu tamatumunnga tunngasunik ilisimatusaatinit tamanit takuneqarsinnaalluni. Ajornartorsiutit nammineq isitsinnik takorusukkutsigit akissarsisoqartillugu illoqarfimmi pisut takuniarsinnaavagut.

Imigassamik aalakoornartulimmik atuinerlunnerup kingunerisaanik sumiginnaanerit ilungersunartut pissutigalugit imigassamik aalakoornartulimmik atornerluineq meeqqanit inuusuttuaqqanillu ajornartorsiutitut annertuutut isigineqartoq Meeqqat Oqaaseqartartuata angalaneranit nalunaarusiat takutippaat. Meeqqat oqaluttuaraat nakkutigineqaratik aammalu isumassorneqaratik, kaattarlutik kiisalu timikkut persuttarneqartarlutik tarnikkullu eqqugaasarlutik.

Imigassaq pillugu inatsimmi allannguutissatut siunnersuutigineqartut inuttut kiffaanngissuseqarnermut annertoorujussuarmik ilungersunartunillu sunniuteqartussatut Atassutip Inuusuttaanit isiginiarneqarput. Isumaqarpunga tamanna ingasattajaarnerusoq, tassami ulluinnarni atuisut imigassamik aalakoornartulimmik pisinissamut periarfissaannut siunnersuut annertunerusumik sunniuteqassanngimmat. Akerlianik siunnersuut meerartatsinnut inuusuttuarartatsinnullu sunniuteqarluassaaq.

Siunnersuut ullumikkut piffissanut ammasarfinnut sungiusimasatsinnut atatillugu annikitsuinnarmik allannguuteqassaaq. Akerlianik imigassamik aalakoornartulimmik akullit saqquminnginnerulernissaannik siunnersuut nassataqassaaq. Siunnersuummi siunertarineqartoq tassaavoq imigassat aalakoornartullit niuertarfinni saqqumisumiinnginnissaat aammalu tupamik ussassaarutit ullumikkutut saqquminnginnerattut imigassap aalakoornartullip ussassaarutigeqqusaajunnaarnissaa. Ilisimatusaatit takutippaat imigassamik aalakoornartulimmik atuinerput eqqarsaatigalugu meerartagut inuusuttuarartagullu pingaartumik ussassaarutinit takusaqartarnermikkut sunnerneqartartut.

Nunanit allaneersut ussassaaruteqartarnerat pillugu maleruagassiorsinnaannginnatta ilumoorpoq. Taamaattoqarneratali nunatsinni nittarsaassinermut iliuuseqarsinnaanissarput unitsissanngikkaa isumaqarpunga. Tupamik tunisassianut ussassaarutit inerteqqutigereerpagut, taamaattumillu imigassamik aalakoornartulinnik ussassaarutinut sooq inerteqquteqarsinnaanissatsinnut suut akimmiffiunersut takujuminaatsippara.

Takornariat Atassutip Inuusuttaasa oqarnerattut immiaaqqanik pisisinnaanermik periarfissaat eqqarsaatigalugit takornariartitsinermik ingerlatsisut kissaatigigunikku tikeraartunut imigassamik aalakoornartulimmik sassaallerusukkunik sassaallernissamut immikkut akuersissummik pissarsisinnaanermik siunnersuut ilaqarpoq.

Inatsimmi pingaarnertut anguniarneqartoq tassaavoq meeqqat inuusuttuaqqallu imigassamik aalakoornartulimmik atornerluisunngunnginnissaat inersimasullu atornerluinerannik pitsaaliuinissaq. Anguniagaq tamanna angussagutsigu imigassamut aalakoornartulimmut inatsisip sukaterneranit annertunerusumik iliuuseqartariaqartugut ilisimalluinnarpara. Taamaakkaluartoq imigassamut aalakoornartulimmut inatsimmik sukaterineq alloriarnertut eqqortutut isigaara.

Maanna iliuuseqartariaqarpugut sakkussallu tamaasa atortariaqarpagut. Inuiaqatigiinni atornerluineq annertooq aammalu meeqqat inuusuttuaqqallu amerlasuut inuunerannik aserorterisoq pinngitsoortinniarlugu anguniagaqarfiusumik sulissutiginiarlugu suleqatigiittariaqarpugut.

Annertunerusumik paasisaqarusukkaanni saaffissaavoq naalakkersuisumut allatsi Nauja Møller, mobil: +299 58 26 54 imaluunniit e-mail: nmoe@nanoq.gl