Meeqqat Ulluanni unammisitsineq

Qanoq isillutit pinngortitaq saligaatsuutippiuk?

Qanoq isiorlutit iginneqartartunut ikilisaaniaqataavit?

Qanoq isilluta pinngortitami aqqusinermilu eqqagassat ikilisissinnaavagut?

Suliniut Qujanaq ullumikkut taama apeqquteqarpoq. Qujanaq-mi suliniutip Meeqqat Ulluat malunnartinniarlugu unammisitsivoq, meeqqat inuusuttullu qanoq pinngortitap saligaatsuutinneranik, titartakkamik assilissamilluunniit tunniussinermikkut peqataaffigisinnaasaannik. Unammisitsinermut peqataaniaruit Facebookkikkut aammalu Katuami Nuummi peqataasinnaavutit. Facebookkikkut unammisitsineq una sapaatip akunnera tamaat ingerlanneqassaaq.

”Eqqagassat ataatsimoorluta akisussaaffigivagut. Eqqagassat angerlarsimaffitsinni, aqqusinermi, pinngortitami imaanilu qanoq pisarnerigut tamatta eqqumaariffigissavagut. Taamaattumik titartakkanik assilissanillu nutaanik iliuuserineqarsinnaasunut isumassarsiorfiusinnaasuni takunissara qilanaarivara, taamaattumik meeqqat inuusuttullu tamaasa unammisitsinermi peqataanissannik kaammattorpakka,” Naalakkersuisut Siulittaasut Kim Kielsen oqarpoq.

Facebookkikkut quppernitsinni unammisitsinermut peqataagit (uunga iserlutit: https://www.facebook.com/qujanaq) Unammisitsinermi poortugaq Qujanaq-minngaanneersoq eqqugassaavoq, taassumalu imarai atuagaq plakaterlu pinngortitatsinnut tunngasut, allisitsiut aammalu qattaq (siparneq), taakkulu atorlugit nunami paasisassarsiorsinnaavutit.

Suliniut Qujanaq eqqaavinnut atuisartunut tamanut qujarusuppoq. Eqqaaviup atorneratigut pinngortitarput saligaatsuutippat.

Namminersorlutik Oqartussat suliniummik ”Qujanaq”-mik ingerlatsisuupput.

Annertunerusumik paasisaqarusukkuit uku attavigikkit:

Allaffimmi pisortaagallartoq, Karen Anne Arleth, oqarasuaat: 34 54 65 email: knar@nanoq.gl