Tasiilaq annertuumik salliutinneqarpoq

Tasiilami isumaginninnermi annertuunik unammilligassaqartoq Naalakkersuisut eqqumaffigilluinnarpaat. Unammillernartut taakkua suliassaqarfinni arlalinni annertuumik suliniuteqarfiginissaat pisariaqarpoq, suliniutit ilinniarnermut, suliffeqarnermut, peqqissutsimut isumaginninnermullu tunngasut. Taamatuttaaq unammillernartut aaqqiivigissagaanni Naalakkersuisut Kommuneqarfik Sermersuullu tapersiinissaat pingaaruteqarpoq. Tamaammat Tasiilami suliniutinik arlalinnik Naalakkersuisut aallartitsisimapput, pisuni arlalinni Kommuneqarfik Sermersuup oqaloqatigineratigut pisimasuni.

Suliniutit immikkuullarissut Naalakkersuisut Tasiilami aallartissimasaat ilaatigut makkuupput: Sulianik meeqqanut inuusuttunullu tunngasunik tapersiineq, Tunumi Siunnersortinut ikiortitut ilinniartunik holdimik aallartitsineq, suleriaatsimik Ilaqutariinnik isumasioqatigiisitsinermik suliamut attuumassuteqartunik sulisunik pikkorissartitsineq, angutit ikorfartoqatigiiffiannik pilersitsineq, ilaqutariinnut inissianik qimarnguinnillu pilersitsinissamut iluarsartuussinissamullu tapiissutinik aningaasaliineq kiisalu aalisarnermik inuussutissarsiornerup siuariartornissaa qulakkeerniarlugu Kommuneqarfik Sermersuup suleqatiginissaanut isumaqatigiissuteqarfiginera. Aammattaaq meeqqanut inuusuttunullu kinguaassiuutitigut atornerlugaasimasunut katsorsaanissap aallartinneqarsinnaanera sulissutigineqarpoq. Taamatuttaaq Tasiilami ilinniarfiusinnaasumik aallartitsinissamut periarfissaqarnersoq paasiniarlugu 2017-imi misissuinermik aallartitsisoqassaaq. Taakku saniatigut Pinaveersaartitsineq pillugu Qitiusumik Ataatsimiititaliap ataani Naalakkersuisut Suliaqarfiit akimorlugit Ataqatigiissaarisoqatigiit suliniutaannut Tasiilaq illoqarfittut misileraaffiusussatut toqqarneqarsimavoq.

Naalakkersuisoq, Sara Olsvig Tasiilami pisoq suliniutillu pillugit ima oqarpoq: ”Tasiilami isumaginninnermi unammilligassat pimooruttariaqarput. Taamaattumik Tasiilami suliassaqarfinni assigiinngitsuni suliniutinik arlalinnik Naalakkersuisut aallartitsisimapput. Erseqqissassalluguli pingaaruteqarpoq Tasiilami unammilligassat Naalakkersuisut kisimiillutik aaqqiivigisinnaanngimmatigit. Najugaqarfimmi aamma allannguerusussuseqartoqassaaq. Tasiilami pissutsinut pitsanngorsaataasinnaasunik Kommuneqarfik Sermersuup suliniuteqarnermigut tapersiinissaa suliniummi pisariaqartinneqarpoq.”

Allanik apeqqutissaqaraanni una attavigineqassaaq: Naalakkersuisup allattaa Nina Jul Larsen, Mobil +299 53 93 71, mail: nina@nanoq.gl