Nunaqarfinni iluatsittumik ingerlasut ujartorneqartut

Inoqarfiit minnerit ataatsimeersuartinneqarnerisa ullut aappaanni nunaqarfinni iluatsittut itisilerlugit saqqummiunneqarnissaat ujartorneqrapoq. Oqariartuut tamanna saqqummerpoq ”Meeqqat inuusuttullu inuuniarnikkut atugaasa toqqissimanartuullutillu ineriartorfigiuminartuunissaat” qulequtaralugu oqallinnermi, tassani sammineqarlutik nunaqarfinni ilinniartitaanerup piorsarnissaa, ilinniartitaanikkut nunaqarfinni unammilligassat kiisalu nunaqarfinni isumaginninnikkut suliniutit suleqatigiinnerlu.

Saqqummiisoqarnerani ilatigut oqaatigineqarpoq meeqqat inuusuttullu nunaqarfimmiut meeqqat atuarfiannik naammassinninnissamut kingornalu nunaqarfimminni atorsinnaasaminnik ilinniagaqarnissaminnut sunik unammilligassaqarnersut. Tamanna peqataasut ilaannik qisuariartitsivoq. Apollo Mathiassen Nunaqarfinni Aqutsisunut Saattunit ilaasortaq oqarpoq:

”Unammilligassat misissorneqarsimallutik oqaluttuarineqarpoq, sooq ingerlanneqarsinnaannginnerat iluatsissinnaannginnerallu nassuiarneqarlutik. Aamma nunaqarfinni iluatsittoqartarnera oqaatigineqarpoq. Kisianni sooq iluatsissimanersut misissorneqanngillat. Iluatsittut amerlanerusut malitassatut tusassallugit pisariaqartippavut. Aamma pisariaqartipparput sooq ilaat iluatsissimanersut tusassallugu.”

Oqariartuut tamanna ataatsimeersuaqataasunit tigulluarneqarpoq:

”Nuannersut iluatsittullu oqaluttuarissallugit pikkoriffiginerusariaqarparput. Namminersorlutik Oqartussani, kommuneni inuttaasullumi akornanni.

Ataatsimeersuarnerit amerlanerusut kissaatigineqarpoq

Ullup sinnerani ataatsimeersuaqataasut suleqatigiiaarlugit sulisinneqarput makku sammillugit:

1. Siunissami nunaqarfiit inoqarfiillu minnerusut
- Nunaqarfiit inoqarfiillu minnerit qanoq iliussappat siunissami kommunit Namminersorlutik
Oqartussallu peqatigalugit ataannarnissamut tunngavissaqarnissartik qulakkeerniassagunikku?

2. Inuutissarsiornermik, pilersuinermik namminersortullu suliffiutaasa ineriartornissaannik
periarfissagissaartitsinissaq
- Nunaqarfinni inuutissarsiornerup pilersugaanerullu ineriartortinnissaannut sinaakkutit
pitsanngortinnissaannut iliuusissanik pingaarnersiuillusi allattuigitsi.

3. Meeqqat inuusuttullu inuuniarnikkut atugaasa toqqissimanartuullutillu ineriartorfigiuminartuunissaat
- Nunaqarfiit inoqarfiillu pilerinartuullutillu ineriartortitsivissaqqissuunissartik attatiinnarumallugu qanoq
iliorlutik inuusunnerusortatik tigummiinnarniarsinnaavaat?

Ataatsimeersuarnermit inerniliunneqartut malitseqartinneqarnissaat qulakkeerniarlugu Naalakkersuisunit, kommunenit Nunaqarfiillu Aqutsisuinit aallartitaqarfiusumik suleqatigiissitaliortoqarpoq.

Ataatsimeersuarnerup ingerlanerani kissaatigineqarpoq inoqarfiit minnerit qinigaaffiup qiteqqunnerani nalilersuisoqartoqartariaqartoq. Taamannak kissaateqarnermut siunertarineqarpoq aalajangersimasunik sammisaqarluni oqaluuserisaqartarnissaq, massakkutut sorpassuit angumeriniarsaralugit oqallinnerminngarnit. Kissaat tamanna Naalakkersuisunit tusaatissatut tiguneqarpoq periarfissallu misissorniarneqarlutik.

 

Paasisaqarnerorusuttut attavigisinnaavaat Tusagassiivimmi pisortaq Paornánguaq Kleist, oqarasuaat +299 559424 imaluunniit e-mail paok@nanoq.gl.