Piniartillutit pisat tamaat nassartassavat

Pinngortitaata pisuussutaanik atuineq akisussaaffiliivoq. Piniagassanik assigiinngitsorpassuarnik peqarpugut, tuttut, nannut, timmissat, puisit, arferit il.il.

Taamaammat piniarnermi inatsisit atuuttut naapertorlugit ingerlanneqassaaq. Tassungalu ilaavoq pisarisaq tamakkerlugu atorneqarnissaa. Pisaqaraangavit neqi, nerineqarsinnaasoq atorneqarsinnaasullu tamaasa nassartarnissaat.

Aalisarnermut Piniarnermullu Naalakkersuisoqarfik piffissap kingulliup ingerlanerani qilalukkat qernertanik mattaajakkanik nalaataqarsimasunik nalunaarutinik assigiinngitsunik tigusaqarsimavoq. Qilalukkat qernertat piniagassaapput pingaarutilissuit atorluagassallu. Allatut iliuuseqarneq inerteqqutaavoq, akuerineqarsinnaanani nunattalu pisuussutaannik atornerluinerulluni.

Aalajangersakkanik unioqqutitsinerit akiliisitsinermik kinguneqarsinnaapput sunngiffimmilu imaluunniit inuussutissarsiutigalugu piniarnermut allagartagaqarsinnaanermik akuersissuteqarsinnaanermillu arsaarinnittoqarsinnaalluni.

Erseqqinnerusumik paasissutissat uunga saaffiginnissutaasinnaapput:

Immikkoortortami pisortaq Amalie Jessen, e-mail amalie@nanoq.gl – tlf. 34 53 04