Ambassadørinut 17-inut Kalaallit Nunaat ilisaritinneqarpoq

30. majimiit 2. juni tikillugu Qallunaat Nunaanni nunanit allanit ambassadørit 17-it Kalaallit Nunaannut tikeraarput. Tikeraarneq Nuummi Ilulissanilu pissaaq, ambassadørillu tikeraarneranni Kalaallit Nunaanni inuussutissarsiornikkut ineriartortitsinissamullu periarfissannik saqqummiivigineqassapput.

Ambassadørit Kalaallit Nunaanni pingaarutilimmik inissisimasut arlaqartut naapippaat Namminiilivinnermut, Nunanut Allanut Nunalerinermullu Naalakkersuisoq, marlunngornermi 30. maj Naalakkersuisut sinnerlugit nereqatigiinnermut qaaqqusimmat. Naalakkersuisup Kunngeqarfimmi maannakkut inissisimaneq oqaluttuaraa, inuussutissarsiornikkut periarfissat ambassadørillu suleqatiginissaasa pingaassusaat ilanngullugit. Naalakkersuisoq ilaatigut ima oqaaseqarpoq:

”Taamaattumik (…) eqqaamassallugu pingaaruteqarpoq Kunngeqarfimmit Danmarkimit aallartitaagassi, ilaallutik Savalimmiut Kalaallit Nunaallu danskit naalagaaffiannut.

Tamanna tunngavigalugu Naalakkersuisut, København-imi Kalaallit Nunaata Sinniisoqarfia, nunanut allanut ministeriaqarfik ilissilu aallartitat suut Kalaallit Nunaannut pingaaruteqarnersut, taamatullu suliassat aalajangersimasut aallaavigalugit pisinnaasanik agguaaqatigiinneq tunngaviusumik paasisaqarfiginissaat ilisimasaqarfigilernissaallu pingaarutilerujussuupput. Taamaalillutik Kalaallit Nunaata avataanit saaffiginnissutit tulluartumik Kalaallit Nunaannit nunarsuarmiillu nunatsinnut soqutigisalinnik akuutitsilluni suliarineqartarniassammata.

Taamaattumillu Kalaallit Nunaanni soqutiginartunik assigiinngitsunik toqqaannartumik naapitaqarsinnaanersi pingaarutilerujussuuvoq, taamatullu uani angalanermi politikkikkut siunnerfitta pingaarnersiukkattalu suunerinik toqqaannartumik oqaloqatigiissutiginissaat periarfissaassalluni”.

Taassuma saniatigut Kalaallit Nunaanni inuussutissarsiornermut periarfissat assigiinngitsut ineriartortitsinissamullu takorluukkat saqqummiunneqarput. Ambassadørinilu qaaqqusaaqatini sinnerlugit naatsumik oqalugiarpoq ungarnimit ambassadøri, László Hellebrandt, tikilluaqquneqarnertik, tikeraarnertik nereqatigiinnerlu qujassutigalugu. Ambassadørip eqqaavaa suliamut tunngasunut, inuttullu Kalaallit Nunaat tikeraassallugu ambassadørinit angorusunneqarsimasoq. Tikeraarneq pingaaruteqarpoq, nunat akornini suleqatigiinnerup siunissami Kalaallit Nunaata nukittunerusup attassisinnaasullu nukittorsarnissaanut.

Nereqatigiinnerup nalaani tikeraat kalaallimit erinarsortartumit taalliortumillu, Nina Kreutzmann Jørgensen-imit aliikkusersorneqarput.

Attavissaq: Naalakkersuisoqarfimmi pisortaagallartoq, Jacob Isbosethsen, +299 556772.